Francisco Maukura Deklara Aberta Kona-bá Nia Kandidatura Ba Prezidente Repúblika Períodu 2027-2032

Francisco Dionisio Fernandes “Maukura” (faru-mutin liman narok) deklara aberta nia kandidatu ba Prezidente Repúblika períodu 2027-2032, Sábadu 05 Setembru 2026.

Díli, 05 Setembru 2026 (RAFA) –Diplomata Francisco Dionisio Fernandes “Maukura”, Sábadu-ne’e,  iha Díli, deklara  abertamente ba públiku kona-bá nia  kandidatura ba  Prezidente Repúblika Períodu 2027-2032.

Francisco Dionisio Fernandes “Maukura”  liuhosi konferénsia imprensa, deklara  durante ne’e nia hala’o servisu lubuk ida  iha areá diplomásia liuliu kontribui ona ba Timor-Leste tama iha Organizasaun Komérsiu Mundiál  no nia efeitu imediata mak Timor-Leste sai membru plenu iha ASEAN  tinan 2025. Nune’e,  ho  esperiénsia diplomásia lubuk ne’e  nia parte hakarak kandidatu aan ba Prezidente Repúblika períodu 2027-2032 hodi  kontinua tau matan ba dezafiu nasionál iha Timor-Leste  hanesan  dezenvolvimentu nasionál no dezenvolvemntu ekonómia.

“Ha’u  nia  koñesimentu kle’an iha asuntu internasionál diplomásia no  koñese mós Timor-Leste nian nesesidade dezde kedan ahu-kdesan ita hahú husi Palasiu Sinzas agora mai ho Palásiu Prezidente hira mak ita liu ona. Ne’ebé ha’u hanoin katak ho desizaun avansa tanba ida prosesu eleitoral konstituisaun garante, kualkér sidadaun ne’ebé idade 30 ba leten bele aprezenta ann mós ba kandidatu Prezidente Repúblika,” Francisco “Maukura” hateten.

Maukura avansa ho kandidatura independente para bele fó diresaun ba nasaun no  halo jestaun ba estadu, inklui knaar importante mak tenke obedese totalmente nasaun no povu no hakruuk ba konstituisaun RDTL.

Nia afirma Prezidente Repúblika nia knaar hanesan guardaun ba nasaun,  Prezidente Repúblika nia knaar hanesan unifikadór, para bele kaer Timoroan hotu hodi apoiu Governu sesé de’it para halo sira nia knaar.

Nia adianta programa prinsipál ne’ebé sei lori mak ko’alia kona-bá unidade nasionál, no tenke haré knaar orgaun soberania haat ne’ebé eziste iha Timor-Leste.

“Ha’u hanoin ita  sei ko’alia detallu  programa iha tempu períodu  eleitoral kampaña nia mai, maibé ha’u bele   fó koko balu de’it, mak unidade nasionál, promove koezaun nasionál halo dialogu ho forsa politikú ne’ebé iha Parlamentu Nasionál tantu oposizaun tantu Governu liuliu kona-bá interese nasionál,” tenik nia.

Maukura subliña nia  estrutura to’o iha Munisipíu tanba halo aliansa bolu konsellu nasionál ne’ebé kandidatu ida-ne’e iha preparasaun di’ak estrutura di’ak, no hetan apoiu husi konsellu nasionál inklui mós ho sobrevivente masakré santa kruz  12 Novembru, Renetil nomo kaixa klandestina hotu.

Jornalista: Zita Menezes