ETO-TELCO ho Timor Telecom Asina Akordu Kooperasaun Ba Live Streaming Kopa Mundiál 2026

Jerente ETO TELCO, Edmundo Freitas Lopes asina akordu ho Diretór Marketing Timor Telecom Luis Vidigal kona-bá sub-lisensa transmisaun Kopa Mundiál 2026 iha live streaming Timor Telecom.

Díli, 03 Juñu 2026 (RAFA.TL)– ETO-TELCO ho Timor Telecom (TT) asina  akordu parseria ida ba transmisaun Over-The-Top (OTT) ba jogu sira Kopa Mundiál 2026 nian liuhosi aplikasaun streaming sira.

Notísia Relevante: ETO-TELCO Fó Sub-Lisensa Ba RTTL, E.P Transmite Kopa Mundiál 2026

Akordu sub-lisensa husi ETO-TELCO ba Timor Telecom ne’ebé realiza iha studio sentral NTV  iha  Torreto Edifísiu, Díli, Kuarta (03/06/2026), asina direita husi Jerente ETO-TELCO Edmundo Freitas Lopes ho Diretór Marketing Timor Telecom, Luis Vidigal.

Hafoin assinatura akordu sub-lisensa ne’e,  Jerente ETO-TELCO, Edmundo Freitas Lopes hateten, kooperasaun ida-ne’e foin ba dahuluk ho Timor Telecom (TT) hodi fasilita  transmisaun kopa mundiál 2026 liu husi aplikasaun streaming OTT ba kliénte   Timor Telecom sira iha rai-laran.

“Ita hotu hatene katak kopa mundiál  ne’e festadesportivu mundiál ida ne’ebé ema hotu hein atu asiste, entaun objetivu husi kooperasaun ne’e oinsá bele estende kobertura transmisaun  live streaming husi aplikasaun apropriadu Timor Telecom nian ba to’o iha nivél munisípiu to’o postu administrativu. Ita hotu nia hakarak ne’e teritóriu Timor laran tomak bele asesu kopa mundiál liu hosi Free-to-Air (FTA), televizaun no mós streaming,” Edmundo Freitas informa.

Jerente  ETO-TELCO ne’e afirma koopersaun ida-ne’e primeira-vez ho operadór telekomunikasaun Timor Telecom,  mézmu ida tinan sira liuba halo ona ho operadór seluk, maibé tinan ida-ne’e espesialmente ho Timor Telecom.

Nia hatutan direitu hotu-hotu ba kopa mundiál 2026 ne’e ETO-TELCO asina direitu tolu, ida mak televizaun asinatura liuhosi ETO-TELCO, direitu seluk mak deborla free-to-air ETO-TELCO halo kooperasaun ho Rádiu Televizaun Timor-Leste, empreza públiku (RTTL,E.P),  direitu seluk mak ho Timor Telecom streaming halo sub-lisensa ho eskluzivu.

“Koopersaun ho Timor Telecom ida-ne’e bele atende de’it mak kliénte  Timor Telecom, mak bele adere ba servisu ida-ne’e, signifiká  numerú  Timor Telecom mak bele asesu ba live streaming kopa mundiál 2026,” Nia subliña.

Iha fatin hanesan Diretór Marketing Timor Telecom Luis Vidigal hateten, nia parte orgullu  mai hamrik iha ne’e reprezenta empreza ida ne’ebé mak foin daudaun Timoroan rasik kaer ona liuhosi sr. Nilton Gusmão hanesna asionista maioria iha empreza Timor Telecom.

“Ami kontenti atu hamriik iha ne’e, lori Timoroan nian naran lori Timoroan nian imajen marká istória foun ida ami, hakat foun ida embora hatene katak ida-ne’e pasu ida ne’ebé mak foin hahú sei la’o nei-neik, maibé ida-ne’e ami hahú ona atu oferese ba ami nian kliénte Timor Telecom liu husi parseira ho ETO-TELCO. Mehi ida ne’ebé uluk ami mehi ona,” Luis Vidigal hateten.

Timor Telecom marka ona istória dahuluk,  hodi nune’e, bele fasilita kliénte sira Timor Telecom nian asesu ba plataforma streaming liuhosi browser no iha faze segundu sei disponiliza mós husi aplikasun telemovél nian hodi nune’e bele perminte asiste kopa mundiál 2026.

Diretór Marketing Timor Telecom Luis Vidigal afirma Timor Telecom fó garantia katak rede internet Timor Telecom ne’ebé eziste iha munisípiu ho postu administrativu asegura ba fó sai ho live kopa mundiál, katak  ami sei lansa pakote ba kopa mundiál nian signifika  kliénte sira bele asesu ho di’ak ba servisu streaming ne’ebé mak ami sei fornese liuhosi parseira ho ETO-TELCO.

“Ami iha plaforma ida termu teknikú ne’e dehan OTT, ne’e kerdizér ita bele asesu ba jogu sira ne’e liu husi browser, website, google chrome, ka internet explorer no seluk-seluk tan, ita tau iha ne’ebá nia  link, ita asesu ba uza username ita nian númeru telemovél ho kodigú autokey ne’ebé bainhira ita  deskreve cc para depois bele asesu ba iha ne’ebá,” nia esplika.

Segundu faze sei disponiliza ba iha aplikasaun hanesan iha  YouTube karik, tenke ba download iha Play Store. Nia afirma pakote asesu ba kopa mundiál live streaming ne’e depende ba utilizasaun,  hanesan baibain asesu ba iha YouTube ho  utilizasaun normal.

Serimonia  asina akordu kooperasaun ETO TELCO ho Timor Telecom (TT) ne’e akompaña direita husi CEO empreza Grupu ETO Nilton Telmo Gusmão dos Santos no Jerente sira Timor Telecom.

Kopa Mundiál FIFA 2026 sei hala’o iha Estadus Unidus Amérika, Kanadá, no Méxiku entre Juñu no Jullu 2026, sai hanesan edisaun dahuluk ho ekipa partisipante hamutuk 48.

Kopa mundiál ne’e sei transmiti hosi ETO TELCO, liuhosi kanál NTV (transmite gratuita), liuhosi streaming no iha TV pré-pagu.

Kompañia – ne’ebé hetan direitu transmisaun ofisiál FIFA nian iha Timor-Leste ho folin dolár rihun 400 – asina mós akordu sub-lisensa ida ho RTTL, E.P. ho folin dolár  amérika rihun 200.

Akordu ne’ebé asina iha loron 22 fulan-Maiu iha édifisiu sentrál RTTL,E.P iha Caicoli ne’e hetan partisipasaun husi Sekretáriu Estadu Komunikasaun Sosiál (SEKOMS), Expedito Dias Ximenes.

Jornalista : Zita Menezes/Editór: Vito Salvadór