Empreza Grupu ETO Inaugura TORRETO Edifísiu, “Esperansa Ne’ebé Mai Husi Mehi no Onestidade”

TORRETO Edifísiu

Díli, 18 Maiu 2026 (RAFA.TL)- Empreza Grupu Esperança Timor Oan (ETO), Sesta (15/05/2026), realiza serimónia inaugurasaun no lansamentu TORRETO Edifísiu  iha Mandarin ne’ebé sai hanesan sentru ba atividade negósiu grupu empreza nian hodi hametin ekonomia nasionál no kria oportunidade servisu ba  Timoroan sira.

“Ohin, selebra momentu importante ba Grupu ETO tanba horseik ofisialmente ita asumi ona nu’udár asionista maioritaria iha Operadór Antigu liu iha ita-nia rain Timor, mak Telekomunikasaun Timor Telecom,  ita hotu-hotu orgullu tanba hanesan ha’u dehan, mai husi ita nia esforsu hotu mak ita hahú husi atividade ki’ik ida transforma sai atividade ne’ebé koñesidu nu’udár marka nasionál iha ita nia rai,” CEO Grupu ETO, Nilton Telmo Gusmão dos Santos hateten.

Nia esplika husi empreza oan sira ne’ebé iha ho atividade hotu ne’ebé empreza halo ne’e  kontribui ona ba dezenvolvimentu ekonomia iha rai laran. Tanba grupu ETO diversifika ona atividade ekonomika lubuk ida, hahú husi produsaun bee ho marka Gota,  iha mós Teknolójia informasaun ETO TELCO (Rafa no NTV), iha atividade kafé ho marka KTON, iha Karteira Eletrónika Ti-oan ne’ebé utiliza para fasilita ema halo tranzasaun ba  sosa pulsa EDTL, pulsa Telefone no seluk tan, iha mós mina no gas, para aleinde ne’e, Grupu ETO mós iha atividade konstrusaun G&S no atividade ekonomiku seluk tan ne’ebé Empreza Grupu ETO iha atu tulun Timoroan sira.

CEO Grupu ETO mós apresia ba kada jerente sira empreza oan sira grupu ETO nian ne’ebé ho dedikasaun no esforsu, servisu maka’as no onestidade hodi tulun hamoris no jere empreza oan sira hodi habót Grupu ETO hodi diversifika kampu traballu no fó servisu barak liután ba Timoroan sira.

“Ne’ebé ho sira nia kontribuisaun ka sira nia ezisténsia hamutuk ho empreza liu husi sira nia didikasaun esforsu hotu kontribuisaun ne’ebé la kolen maka transforma grupu ida ne’e sai ema barak sosiedade Timoroan barak koñese. Se sira la presta ho laran fuan ha’u fiar katak ami mos labele to’o iha nível ida ne’e,” Nilton Gusmão hateten.

Iha reflesaun ba inaugurasaun nian, Pe. Gui do Carmo da Silva, SDB hatete, TORRETO Edifísiu hamrík metin nune’e tanba mai husi sakrifísiu, dedikasaun no esperansa ne’ebé lori ksolok.

“Ohin, edifísiu ne’e hamrík tanba iha esforsu, dedikasaun ne’ebé mai ho sakrifísiu oin-oin, dalaruma triste, laran susar, maibé ba Maromak buat hotu sei nakfila ba ksolok bainhira iha esperansa no fiar metin,” Pe. Gui do Carmo da Silva, SDB afirma.

Iha serimónia inaugurasaun ne’e, Padre fó bensaun ba kada pizu husi TORRETO edifísiu no akompaña direta husi CEO Grupu ETO Nilton Telmo Gusmão dos Santos ho espoza Sidália dos Santos  no kolaboradór sira empreza ETO nian.

Empreza subsidiáriu  husi grupu ETO nian hamutuk 16 mak hanesan ETO Moving, G&S konstrusaun sivil, GOTA, Santos Living, Detile, D’City Hotel, ETO-TELCO (Rafa no NTV), ETO Gas, VIP Gas, ETO the avitation servise kompany, KTON, ETO E&P, Nine Apparel, Ti-Oan Fintech, Hotel Timor no Supernine.

Jornalista: João Carlos/Editór: Vito Salvadór