Deskonfia Índianu Na’in-Rua Envolve iha Tráfiku Umanu

Índianu na'in-33 ne'ebé suspeita ba vitima tráfiku umanu submete ba identifikasaun iha PNTL.

Díli, 17 Juñu 2026 (RAFA.TL)– Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK) asegura Índianu na’in-rua, hanesan jerente ba kompañia  internasionál ida ne’ebé deskonfia envolve iha tráfiku umanu hodi lori sira-nia maluk Índianu na’in-33 mai Timor-Leste.

Diretór Servisu Investigasaun Kriminal (DSIK), Superintendente Xefe Polísia João Belo dos Reis, Kuarta (17/6/2026), informa sidadaun Índia hamutuk na’in-33 ne’ebé suspeita sai vítima husi rede tráfiku umanu no esplorasaun servisu iha Timor-Leste ne’e hato’o keixa ba Polísia.

“Ita halo hela identifkasaun Indianu na’in-35, kompostu husi na’in-33 suspita ba vitima tráfiku umanu no na’in-rua (2) deskonfia suspeitu ba atividade tráfiku umanu ne’e,” Diretór DSIK Superintendente Xefe Polísia João Belo dos Reis hateten.

Husi informasaun ne’ebé mak polísia rekolla, posibilidade índianu  na’in-33 suspeta ba vitima tráfiku umanu.

João Belo dos Reis, informa dadaun ne’e Polísia husu ona asisténsia ba iha Komisaun Nasionál Tráfiku Umanu nian hodi bele fasilita buat ruma, nune’e hakle’an investigasaun atu identifika ema se de’it mak lori Índianu sira mai iha Timor-Leste no oinsá modu operandu.

Indianu na’in-rua ne’ebé lori vitima sira mai iha Timor-Leste, PNTL bolu ona  no sei bolu tan balun balu hodi  halo identifikasaun molok aprezenta ba iha Ministériu Públiku (MP).

Diretór DSIK ne’e informa  sei kontinua halo Investigasaun atu identifika autor inteletuál no parte envolvida sira no bainhira iha prova sufisiente suspeitu sira bele hasoru prosesu judisiál tuir lei penal ne’ebé vigora iha Timor-Leste.

Tuir nia kazu ne’e mós sai hanesan avizu importante ba sidadaun sira ne’ebé buka oportunidade servisu iha rai-li’ur ka iha Timor-Leste atu sempre verifika legalidade kontratu servisu, dokumentu viajen no identidade kompañia ka ajénsia sira ne’ebé halo rekrutamentu ho promesa fasilita ba servisu iha rai-li’ur nune’e evita sai vítima ba rede tráfiku umanu.

Jornalista: João Carlos/Editór: Vito Salvadór