Autór Prinsipál Ba Aplikasaun SnapBoost Entrega Aan Ba PCIC

Logotipu PCIC

Díli, 18 Abríl 2026 (RAFA.tl)- Autór prinsipál ba aplikasaun SnapBoost iha Timor-Leste inisiál JF,  Sesta (17/04/2026), ho vontade rasik entrega aan ba Polísia Sientífiku Investigasaun Kriminál (PCIC,  sigla portugés), hodi fó deklarasaun bazeia ba keixa husi vítima sira.

Notísia Relevante: PNTL Rejista Timoroan 200-Resin Vítima Ba Jogu Online SnapBoost

Xefé investigadór PCIC, José Maria da Silva  hatete, iha  Sesta ne’e PCIC simu aprezentasaun husi suspeitu prinsipál ba kazu krime SnapBoost ne’ebé dau-daun ne’e ema barak sai vítima no virál iha mídia sosial.

“SnapBoots nia suspeitu prinsipal mai aprezenta aan, entaun ita nia servisu pikete PCIC nian rekolla informasaun barak kona-bá aktu sira ne’e agora dau-daun sei detein oras 12 nia laran ne’ebé ami sei halo identifikasaun,” José Maria da Silva hateten.

Xefe investigadór  PCIC ne’e afirma, suspeitu ho inisiál JF ne’e konsidera hanesan suspeitu  prinsipál tanba nia maka lori snapboost mai iha Timor-Leste, no nia rasik hatene aplikasaun SnapBoots, bainhira  hala’o nia estudu iha  Jakarta-Indonézia iha tinan 2022-2023.

Tuir konfirmasaun ne’ebé parte PCIC iha relasiona ho investigasaun ba suspeitu ne’e, vítima ne’ebé sofre ba aplikasaun husi inísiu to’o iha fulan-Marsu 2026 hamutuk  na’in-2000-resin, no osan sira ne’ebé maka investe ne’e ki’ik maka US$20.00 to’o iha US$10,000.00.

Husi investigasuan ne’e indentifika tan suspeitu na’in-hitu (7) ne’ebé maka subordina husi suspeitu JF maka ho inisiál hanesan,  LM, RH, IF, MH, VO, JF, VDF, no sei iha mós suspeitu sira seluk ne’ebé sei hale’u iha munisípiu sira.

PCIC suspeita JF tanba komete atividade burla ho modu investimentu, hodi bosok vítima sira hatama osan ho montante ne’ebé iha.

“Dau-daun ne’e PCIC sei halo hela investigasaun ba suspeitu refere,  durante oras 12 nia laran, hodi haré prosesu kontinuasaun karik iha partisipasaun ruma ne’ebé kontra suspeitu refere, bele mós iha prosesu krime hodi kontra suspeitu,” José Maria da Silva   hateten.

Hafoin kompleta oras 12, PCIC sei kontaktu fali vítima sira ne’ebé keixa ona suspeitu sira iha edifísiu PCIC, hafoin maka parte PCIC bele deside iha parte keixa no mós prosesu, no sei submete ba iha Ministériu Públiku tuir andamentu lei ne’ebé vigora.

Tuir observasaun Rafa.tl iha edifísiu PCIC nota katak mezmu autór prinsipál ba aprezenta  aan ona ba PCIC, vítima sira kuaze na’in-lima kontinua lori keixa ba PCIC relasiona ho investimentu osan iha aplikasaun SnapBoots.

Jornalista: Remígia Locatelli/Editó: Vito Salvadór