Artista Internasionál Sira Ba Festival TT TasiFest 2026 Orgullu ho Timor Nia Beleza Natural

Reprezentante empreza Kafé Timor Orgániku no Natural (KTON) fahe kafé KTON ba artista internasionál sira ba festival TT TasiFest 2026.

Díli, 29 Maiu 2026 (RAFA.tl)- Artista internasionál sira hanesan Duo Calema, Iwan Fals no Guy Sebastian ne’ebé sei hananu iha festival TT TasiFest  2026  orgullu ho Timor-Leste nia beleza batural no tasi ne’ebé furak.

Festival TT TasiFest tinan ida ne’e hala’o iha Tasi-Tolu, Sesta (29/05/2026), ho objetivu atu hametin liután relasaun amizade entre Timor-Leste ho nasaun viziñu hanesan  Indonézia, Austrália no mós Comunidade dos Países da Lingua Portuguesa (CPLP), inklui promove turizmu Timor-Leste liu husi arte no múzika.

Artista internasionál sira hatudu sira nia sentimentu orgullu ba  Timor-Leste ne’ebé maka konvida ona sira atu mai anima sosiedade Timor-Leste liu husi festival TT TasiFest tinan ne’e.

Artista internasionál husi São Tomé e Príncipe, Duo Calema, Fradique Mendes Ferreira no  António Mendes Ferreira, liu husi konferénsia imprensa ne’ebé maka realiza iha Hotel Timor, Kinta (28/05/2026), hato’o agradese ba komisaun organizadora TT TasiFest ba tinan ida ne’e, tanba bele fó tan oportunidade ba sira bele mai  Timor-Leste ba dala-rua.

Sira argumenta katak, razaun simu konvite husi TT TasiFest ba tinan ida ne’e, tanba hakarak hametin liután relasaun amizade ho Timor-Leste, tanba hanesan nasaun ne’ebé mós hola parte iha komunidade CPLP.

“Ha’u sente mai ba dala-rua ida ne’e atu kontinua ligasaun ne’ebé maka eziste iha país Luzófonu sira. Ami kontinua mai iha Timor-Leste, tanba país ida ne’ebé maka furak, riku ho imajen di’ak sira, liu-liu tasi no foho sira, ne’ebé sai hanesan memória mai ami nunka atu haluha Timor-Leste,’’ Duo Calema hateten.

Iha fatin hanesan artista lejendáriu husi Indonézia, Iwan Fals kontente ho Timor-Leste ne’ebé furak ho tasi ne’ebé hanesan ezemplu ida ba nasaun seluk atu kuidadu tasi hodi fó moris ba biodiversidade sira.

“Tasi ne’e di’ak no mós kapaz tebes, husi ne’e haré katak Timor-Leste ne’e hanesan fatin ezemplu ida ba nasaun seluk atu kuidadu ambiente tasi,” Iwan Fals hateten.

Artista Austrálianu Guy Sebastian hatete, foin ba dala-uluk mai Timor-Leste, nia fuan monu ba Timor tanba haré ba nia populasaun sira, no mós haré joven sira, inklui mós kultura Timor nian ne’ebé maka atrativu kontinua halo nia hakarak kria nafatin memória sira ho nasaun ida ne’e.

Iha ámbitu konferénsia imprensa ne’e mós artista sira ne’e nafatin dezafia Timor oan sira ne’ebé mak sosa ona billete ba festival TT TasiFest  2026 atu ba partisipa iha konsertu tenke kuidadu nafatin ambiente, liu-liu labele soe lixu arbiru hodi garante nafatin Timor-Leste nia ambiente ne’ebé furak no rejiliente liu.

Hafoin konferénsia ba imprensa, empreza Grupu Esperança Timor Oan (ETO), liu husi empreza subsidiária Kafé Timor Orgániku no Natural (KTON) distribui mós kafé ba artista sira Duo Calema, Iwan Fals, Guy Sebastian no mós ekipa banda sira ne’ebé sei anima komunidade Timor-Leste iha Festival TT TasiFest 2026.

Jornalista: Remigia Locatelli/Editór: Vito Salvadór