Arguidu Balun Husi Rede Scam Call Centre iha Ulmera Halai Subar

Julgamentu primeira interogatóriu ba arguidu sira ba kazu scam call centre iha área Ulmera, Liquiça, 17 Jullu 2026

Díli 28 Jullu 2026 (RAFA.TL) – Portavóz Polísia Nasionál Timor-Leste (PNTL), Superintendente Xefe Polísia, João Belo dos Reis, Tersa-ne’e, informa  arguidu balun husi kazu scam call centre iha Tibar-Liquiça, dezvia husi responsabilidade ka halai ses hodi kumpre desizaun kausaun ne’ebé Tribunál Judisiál Primiera Instánsia Díli (TJPID) aplika ba sira, foin lalais ne’e.

“Informasaun ne’e ami hala’o trekking hela parte Tibar ho Ulmera nian. Sidadaun estranjeiru ho nasionalidade Indonézia sira ne’ebe Polísia detein iha fulan kotuk iha operasaun kombate Scam Call Centre nian hodi aprejenta ba Tribunál depois desizaun Tribunál nian haruka sira hela iha ne’ebá atu prosesu ba selu medida kausaun no agora dadaun  iha informasaun ne’ebé ami rekolla  husi servisu informasaun no komunidade katak sidadaun balun dezvia ona fatin konsentrasaun no sira seidauk selu medida kausaun,” Superitendente Xefe Polísia João Belo dos Reis informa ba jornalista sira liuhosi  konferénsia imprensa  iha Kuartel Jerál PNTL.

Nia dehan ho informasaun ne’e ekipa Diresaun Servisu Investigasaun Kriminál (DSIK) ho Servisu Intelijénsia Polísia (SIP) rekolla hela informasaun iha Ulmera hodi buka hatene movimentu arguidu sira ne’ebé halai ses duni husi justisa hodi submete fali ba iha prosesu

Nia  apela ba komunidade atu fó informasaun karik haree ka hatene fatin ne’ebé arguidu sira hela, atu fasilita servisu investigasaun. Informasaun hotu-hotu sei trata ho konfidensialidade.

Iha Kinta liubá,  Tribunál Judisiál Primeira Instánsia Díli (TJPID)  liuhosi despaisu ikus prosesu primeiru interogatóriu deside aplika medida aprezentasaun periódika, proibisaun auzénsia, médida kausaun ba arguidu na’in-75 ho valor 2500.00 USD no ba Arguidu na’in-ida seluk hetan Kausaun 10.000 USD no kontinua ho medida Termu Identifikasaun Rezidénsia (TIR).

Tribunál mós fó prazu loron 10 ba arguidu sira hodi depozita kausaun ne’ebé iha ba Tribunál, se la depozita Tribunál sei halo alterasaun husi medida kausaun ba fali iha medida Prizaun Preventiva.

Iha audénsia julgamentu primeiru interogatóriu ne’e, Ministériu Públiku (MP) halo promosaun ba arguidu na’in-76 ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha jogu online Scam Call Centre.

Jornalista: João Carlos