Alega Komete Krime Fraude Fiskál no Brankeamentu Kapitál, Tribunál Aplika Prizaun Preventiva Ba Sidadaun Indonéziu Na’in-Hitu

PCIC detein arguidu na'in-ualu ne'ebé alega komete krime fraude fiskál no brankeamentu kapitál. Imajen/Espesiál

Díli, 06 Juñu 2026 (RAFA.TL)– Tribunál Judisiál Primeira Instánsia Díli,  aplika medida koasaun  prizaun preventiva ba sidadaun Indonéziu na’in- hitu (7) tanba alegamente komete  krime fraude fiskál no brankeamentu kapitál.

Kazu ne’e envolve mós Timoroan ida, ne’ebé Tribunál mós aplika medida koasaun apezentasaun períodika iha edifísia Polísia Sientifika Investigasaun Kriminál (PCIC) durante loron 15 kada fulan aprezenta dala-rua.

Audiénsia Julgamentu Primeiru Interogátoriu ne’ebé hala’o loron   rua; Sesta ho Sabádu (05-06/06/2026), iha Tribunál Primeira Instánsia Díli (TJPID), Prokuradór Matias Soares ne’ebé reprezenta  Ministériu Públiku alega  arguidu na’in -ualu (8) ho krime fraude fiskál no brankeamentu kapitál ne’ebé previstu no punidu iha   iha artigu 314.º no Artigu 313.º husi Kódigu Penál Timor-Leste.

Prokuradór Matias Soares solita ba  Juis prosesu José Maria de Araújo  atu aplika prizaun preventiva ba arguidu  sira, atu nune’e, fó espasu ba autoridade polísial sira kontinua  prosesu investigasaun.

Jerónimo Piedade da Silva, nu’udár advogadu  privadu  ne’ebé fasilita asisténsia legál ba arguidu sira, husu Tribunál aplika medida koasaun  aprezentasaun períodika  no Termu Identidade  Rezidénsia (TIR) hodii fó biban autoridade polísial kontinua halo investigasaun.

Rona  tiha parte sira hotu,  Juis José Maria de Araújo,   konsidera katak iha indísiu sufisiente, nune’e deside aplika medida koasaun prizaun preventiva ba arguidu na’in-hitu (7),  sidadaun Indonéziu nian, no aprezentasaun períodika ba  Timoroan na’in-ida.

Remata tiha Primeiru Interogatóriu, autoridade seguransa liu-husi  PCIC   servisu hamutuk  ho autoridade kompetente sira transporta sidadaun Indonéziu na’in-hitu ne’e ba kumpre  Prizaun preventiva iha Sentru Prizionál Becora.

Iha Kuarta, 03 fulan-Juñu ne’e, hale’u tuku 11:30 Otl, PCIC   servisu hamutuk  ho komunidade no autoridade  kompetente, detein  suspeitu na’in-ualu, kompostu husi sidadaun Indonéziu na’in-hitu ho Timoroan na’in-ida iha área Kampu Alor, Díli, bá kazu fraude fiskál no bankeamentu  kapitál.

Iha operasaun no detensaun ne’e autoridade polisiál sira  halo  apreensaun ba objetu krime sira, hanesan motór unidade lima (5),  ho   osan mean  balu (seidauk  hatene nia grama) no mós osan.

Audiénsia julgamentu Primeiru Interogatóriu ne’e prezide husi Juis José Maria de Araújo, Ministériu Públiku reprezenta husi Prokuradór Matias Soares no arguidu na’in-ualu (8) hetan asisténsia legál husi Advogadu Privadu Jerónimo Piedade da Silva.

Jornalista: João Carlos/Editór: Vito Salvadór