Fernando de Carvalho Nomeadu Ba Vise-Prezidente CSMJ

Vise-Prezidente Konsellu Superior Majistratura Judisiál, Fernando de Carvallho.

Díli, 04 Novembru 2026 (RAFA)— Konsellu Superiór Majistratura Judisiál (CSMJ, sigla portugés), nomea vogál Fernando de Carvalho bá Vise-Prezidente Konsellu nian hodi troka Francisco Nicolau Li ne´ebé antes ne´e hala´o knar hanesan vise-prezidente.

Vise-Prezidente Konsellu Superior Majistratura Judisiál, Fernando de Carvalho hatete ba jornalista sira iha Tribunál Díli, Kuarta-ne’e, katak nomeasaun ne’e akontese tanba kargu Vise-Prezidente CSMJ mamuk hela, bainhira Francisco  Nicolau  Li husu demisaun husi kargu membru Konsellu Superior Majistratura Judisiál.

“Deliberasaun ne’e loos duni,  membru konsellu sira fó konfiansa mai ha’u atu asume kargu nu’udar Vise-Prezidente, hodi troka  Nicolau Li  iha Konsellu Superior Majistratura Judisiál,”  hatete  Fernando de Carvalho.

Nia subliña, hafoin hetan konfiansa nu’udar  Vise Prezidente Konsellu, nia kompremetidu katak sei servisu hamutuk ho Prezidente Tribunál Rekursu Afonso Carmona. Tanba konfiansa  ne’ebé simu ne’e hanesan responsabilidade ida atu servi interese komun tuir lei haruka.

CMSJ  Hasai Ona Deliberasaun Bá Juíz Estajiariu Sira Bá Terseira Klase

CMSJ liu husi reuniaun konsellu foin dadauk ne’e, iha ona desizaun, estajiairu na’in-neen tama ona kareira nu’udar juíz terseira klase.

Vise-Prezidente Konsellu Superior Majistratura Judisiál, Fernando de  Carvallho, informa reuniaun konsellu foin dadauk ne’e,  iha ona desizaun, estajiairu na’in-neen tama ona kareira nu’udar juíz terseira klase.

“Hein de’it publikasaun  depois  loron 10 atu tomada pose hanesan juíz direitu terseira klase,”   CSMJ Fernando de Carvalho  hateten.

Nia informa, sei hein durante loron-10 bainhira públika ona Jornál da Repúblika, atu  realiza tomada pose. No bainhira  simu ona pose bá Juíz direitu bá terseira klase maka Konsellu Superior Majistratura Judisiál deside halo fali kolakasaun.

Nia subliña, kona-bá rekursu bá Juíz, depende bá polítika Governu,  tanba iha Estadu Timor-Leste opta ona katak, kada Munisípiu tenke iha Tribunál propriu,  nune’e presiza Majistratura Juíz barak tan.

Jornalista: Marcelino Tomae