Grupu Vulneravél iha Risku Afeita Ba El-Niño

Sekretáriu Estadu  Protesaun Sivíl (SEPS), Domingos Mariano Reis.

Díli, 09 Outubru 2026 (RAFA)- Sekretáriu Estadu  Protesaun Sivíl (SEPS), Domingos Mariano Reis hatete bainhira El-Niño akontese tuir previzaun ne´ebé iha, katak  grupu vulneravél sira mak sei afeita liu tanba ne´e  importante tebes ba sidadaun  atu konserva bee  no konserva ai-han iha tempu agora hodi antesipa ba situasaun El-Niño.

Sekretariu Estadu ne´e informa, preparasaun autoridade protesaun sivíl  ba hasoru situasaun El-Niño adekuadu no espesiál ba grupu vulneravél sira, hanesan ema ho kondisaun  difisiénte,  ferik, katuas no  labarik kiik sira.

“Bainhira bee menus risku liu mak labarik sira, banhira ai-han menus risku liu mak labarik sira, bainhira bee menus risku liu ba ema difisiénte sira. Sira nia atividade laiha bee, laiha ai-horis, afeita direita ba sira, ne’e mak bolu grupu vulneravél risku liu,” hatete Sekretáriu Estadu  Protesaun Sivíl, Domingos Mariano Reis ba jornalista sira iha Sesta-ne’e iha Otél Timor.

Fatin hanesan ema ho defisiensia, Abilio Camões husi Raes Hadomi Timor  (RHTO) ne’ebé partisipa iha workshop nasionál, hatete bainhira  akontense El-Niño nia papél no risku boot  ne’e ema ho difisiénsia, tanba ne’e nia husu ba Governu nian asaun  oinsá mak atu bele responde ba iha situasaun  El-Niño.

“Ita hanoin mak ida Governu tenke halo identifikasaun agora,  hamutuk ho parseiru internasionál no parseiru nasionál sira para atu nune’e bele responde lalais ba tempu tinan oin nomós tempu agora ne’ebé akontese El-Niño,” dehan difisiénsia Abilio Camões.

Abilio Camões afirma hanesan ho ema difisiénsia buat ne’ebé sira prepara atu antisipa situasaun El-Niño mak durante ne’e Governu mós envolve sira tuir treinamentu sira ne’ebé bele prepara aan ba situasaun El-Niño.

Jornalista: Zita Menezes