Membru PNTL Foun Tenke Disiplina, Integridade no Profisionál

Kandidatu kadete PNTL husi Munisípiu Aileu ho Ainaro hahú teste kultural iha Komisaun Funsaun Publika, Kinta-Sesta 8-9 Outubru 2026.

Díli, 09 Outubru, (RAFA) – Ministru Interiór, Francisco da Costa Guterres, hatete kandidatu membru Polísia Nasionál Timor-Leste (PNTL) ne´ebé tuir prova kultural iha Komisaun Funsaun Publika tenke iha kualidade, kapasidade, integridade, disiplina ne’ebé apropriadu ba profisaun polísia.

“Ohin, munisípiu rua ka tolu espera katak iha loron hirak nia laran sira bele kompleta ona prosesu, atu ita bele hetan númeru kandidatu ne’ebé ita hakarak, hodi bele tama ba prosesu formasaun. Ita hakarak duni hetan ema ne’ebé iha kualidade, atu bele forma polísia ne’ebé iha kualidade,”  Ministru  Fracisco da Costa Guterres hateten ba jornalista sira, Sesta-ne’e iha Otél Timor.

Iha biban seluk, kandidatu husi Munisípiu Ainaro ne´ebé hetan valor 76,5, Evio Vianney Barros da Costa, hatete, nia iha esperansa atu hetan oportunidade iha prosesu rekrutamentu membru PNTL foun 2026.

“Hau orgullu tebes ho valor ne’ebé ha’u hetan 76,5. Ha’u agrdese tanba ha’u bele pasa iha teste ida-ne’e, ha’u sente teste ida ne’e transparante teb-tebes ho sistema elotronika, ha’u espera ba oin bele hakat liután faze teste psikolojia ho médiku,” Evio Vianney Barros da Costa hateten.

Kandidata Jenilda dos Lima da Costa, ne’ebé la hetan estatutu admitidu iha faze teste ne’e, hatete katak nia triste, maibé sei uza esperiénsia ne’e nu’udar aprendizajen atu prepara an di’ak liu tan, se iha oportunidade rekrutamentu iha tinan oin.

“Hau sente triste uitoan, maibé laiha buat ida tanba ida ne’e ha’u-nia esforsu rasik atu atinje valor ne’ebé iha. Maibé, ha’u sei iha oportunidade iha tinan oin. Ida-ne’e halo ha’u aprende atu prepara an ho másimu, karik iha oportunidade foun atu bele compete,” Jenilda dos Lima da Costa hateten.

Tuir dadus ne’ebé RARA hetan, iha loron dahuluk teste, kandidatu husi Munisípiu Aileu no Ainaro hamutuk ema na’in-904, enkuantu kandidatu na’in-176 la tuir prova.

Husi Munisípiu Aileu, kandidatu na’in-23 mak hetan valor 67 ka liu no hetan estatutu admitidu. Enkuantu kandidatu husi Munisípiu Ainaro, prosesu teste sei kontinua hela.

Jornalista : João Carlos / Mario Fili