Prezidente FFTL Husu Timoroan Hotu Asiste Kopa Mundiál 2026 ho Espíritu Desportivu

Prezidente FFTL Nilton Telmo Gusmão dos Santos

Díli, 03 Juñu 2026 (RAFA.TL)- Prezidente Federasaun Futeból Timor-Leste (FFTL), Nilton Telmo Gusmão dos Santos, husu Timoroan hotu asiste Kopa Mundiál 2026  ho espíritu desportivu, no labele hamosu dezintendimentu sira ne’ebé kria instabilidade tanba futeból nia alvu mak halo ema iha unidade no hamutuk iha vizaun ida ba paz iha mundu.

Notísia Relevante: ETO-TELCO ho Timor Telecom Asina Akordu Kooperasaun Ba Live Streaming Kopa Mundiál 2026

Prezidente Federasaun Futeból Timor-Leste (FFTL), Nilton Telmo Gusmão dos Santos, hateten haksolok no orgullu, lori FFTL no mós FIFA nian naran hakarak hato’o ba Timoroan hotu, katak festa Kopa Mundiál 2026 loron hira tán sei hahú iha nasaun tolu, iha Mexiko, Estadus Unidus Amérika (EUA) no mós Kanada. Ne’ebé ho previleziu, Timor-Leste hetan oportunidade, Timoroan hotu hetan oportunidade, atu asiste jogu Kopa Mundiál 2026 nian, iha kanál tolu; ida hamutuk ho Radiú Televizaun Timor-Leste, empreza públika (RTTL, E.P), NTV no mós iha live streaming nian ho Timor Telecom (TT).

“Lori FFTL nian naran, hakarak kongratula empreza sira ne’ebé ho sira nia disponibilidade ho sira nian kbiit rasik no mós ita nia instituisaun média estatál RTTL,E.P ne’ebé kontinua hakarak oferese servisu ba ita nia povu hodi loke kanál ba ita nia sosiedade hodi bele asiste jogu ka estaklu boot mundu nian ne’ebé ema koñese mundiál 2026 nian,” Prezidente FFTL Nilton Telmo Gusmão dos Santos ba jornalista sira iha Torreto Edifísiu Díli, Kuarta (03/06/2026).

Nia afirma iha tinan barak atividade sira ne’e sempre fó sai direitu tanba hatene katak  sosiédade Timor-Leste  iha paixaun hadomi tebes futeból .

“Empreza grupu  Esperança Timor Oan (ETO) liuhosi ETO-TELCO tenta atu bele hetan lisensa ba transmisaun direita ida-ne’e, maibé buka partilla hamutuk ita nia kanál nasionál RTTL,E.P no ohin hamutuk tán ho ita nian produtu nasionál Timor Telecom, ita bele asesu live streaming liu hosi telemovél sira,” nia tenik.

Dala ida tán,  Niton Gusmão nu’udar mós membru Komité Permanente Anti  Rasizmu no Diskriminasaun FIFA, husu hotu-hotu diverte, katak  fó apoia ba ekipa nasaun sira ne’ebé Timoroan ida-idak eskolla hanesan nia ekipa favoritu iha kopa mundiál ho  paz no lori orgullu ba Timor. Tanba ne’e husu ba foin-sa’e atleta sira ka jogadórsira, ema hotu ne’ebé hadomi futeból, atu akompaña festa ida-ne’e ho di’ak, ho esperitu desportivu, para bele foti referénsia di’ak hodi bele hadi’a mós ita nia futeból rai laran, atu transforma futeból nu’udár orgullu nasionál.

Asiste Direta Serimonia Abertura Kopa Mundiál 2026

Prezidente FFTL Nilton Telmo Gusmão dos Santos hateten nu’udár  Prezidente FFTL no nu’udar membru ba Komité Anti Rasizmu no Diskriminasaun FIFA hetan konvite atu partisipa iha abertura Kopa Mundiál 2026 iha Mexiko.

“Ha’u sei ba loron 09 fulan-Juñu 2026 sai husi iha ne’e ba asiste abertura kopa mundiál 2026 hanesan membru FIFA, iha departamentu Anti Rasizmu no Anti Disikriminasaun sei hamutuk ho membru FIFA selu-seluk no membru asosiasaun sira seluk iha ne’ebá hodi asiste  serimonia abertura to’o iha serimonia finál kopa mundiál 2026,” Nilton Telmo Gusmão dos Santos informa.

Prezidente FFTL ne’e subliña, nu’udár mós membru ba komité anti rasizmu, hakarak timoroan tenke aprende husi desportu futeból atu bele respeita malu, atu hadook diskriminasaun iha ita nian moris loro-loron nian no mós tenke respeita malu liu husi futeból nu’udár Timoroan hotu.

Nia husu Timoroan  tenke asiste ka akompaña espetaklu  mundiál 2026, atu bele unidu liután no hamutuk dezenvolve  rai doben Timor-Leste iha futuru liuliu iha área desportivu nian.

Kopa Mundiál FIFA 2026 sei hala’o iha Estadus Unidus Amérika, Kanadá, no Méxiku entre Juñu no Jullu 2026, sai hanesan edisaun dahuluk ho ekipa partisipante hamutuk 48.

Jornalista : Zita Menezes/Editór: Vito Salvadór