PDHJ husu Prezidente Repúblika Rona Vitíma sira Molok Fó Indultu Ba Richard Dasbach

Provedór Direitus Umanus no Justisa (PDHJ), Virgílio da Silva Guterres “Lamukan” .

Díli, 15 Maiu 2026 (RAFA.tl)- Provedór Direitus Umanus no Justisa (PDHJ), Virgílio da Silva Guterres “Lamukan” husu Prezidente Repúblika (PR), José Ramos-Horta, atu rona mós vitíma abuzu seksuál sira molok  fó  indultu ba Richard Dasbach tanba konsidera krime ne’ebé eis padre ne’e komete grave.

Notísia Relevante: Ramos-Horta Sei Haré Proposta Indultu Ba Richard Daschbach

Provedór Virgílio da Silva Guterres “Lamukan” ba jornalista sira iha Edifisiu Provoziriu PDHJ, Sesta (15/05/2026), hateten iha tinan kotuk bainhira Richard Dasbach naran tama hotu iha lista indultu no  bainhira hasoru malu ho Prezidente Repúblika formalmente fó hanoin katak, provedór laiha kompeténsia atu halo intervensaun iha desizaun Prezidente nian, maibé se bele Pezidente rona hanoin husi vitíma no reprezentante  vitíma nian.

Virgílio Guterres hateten nia parte apresia tebes tanba iha tinan kotuk Prezidente fó espasu atu rona hanoin husi reprezentante vitíma nia ne’ebe ikus mai enkoraza Prezidente atu deside la fó indultu Richard Dasbach.

“Agora tinan ne’e mosu fali iha lista atu hetan indultu ka komutasuan pena hamutuk ho prijioneiru na’in-40 resin seluk, husi parte provedór nian, laiha razaun moral atu fó indultu ba Dasbach tanba to’’o agora nia rekoñese katak nia sala, nia seidauk arepende no nia seidauk husu deskulpa ba vitíma sira, ne’e nia husu deskulpa ona ou nia arepende ona kestaun seluk,  bele sai razaun ba Prezidente, maibé to’o agora  nia la husu  deskulpa,” Virgílio da Silva Guterres hateten.

Kona-bá razaun  umanidade tanba kestaun idade, Provedór hateten razaun refere la propriu atu fó indultu no tuir lolos tenke mantein ho pena ne’ebé antes ne’e iha tanba konsidera krime ne’ebé autor komete grave no afeita direita ba dignidade no integridade vitíma sira nian.

“Sira balu hatete dehan tanba nia katuas ona, no nia idade ona, entaun Prezidente fó razaun, atu hatete katak, Tribunál lolos ne’e,  fó pena ne’ebé mak liu husi tinan-12. Dalaruma bele too tinan 20 tanba  krime grave, maibé Tribunál hatun tiha nia pena ne’e mai tinan 12 tanba razaun katak nia  katuas ona, ne’ebe razaun katuas ne’e, labele ona uza atu fo indultu tenke razaun seluk, tamba razaun katuas ne’e Tribunál uza this ona atu hatun nia pena husi tinan 20 ba  tinan 12,” Nia subline.

Kona-bá lista indultu ka komutasaun pena ba prezu sira, governu liu husi Ministériu Justisa sei aprezenta  hamutuk na’in 40-resin ne’ebé sei hetan indultu inklui mós eis Padre Richard Dasbach  iha loron Restaurasaun Independénsia, 20 Maiu, tinan ne’e.

 Jornalista: Marito da Costa/Editór: Vito Salvadór