Ministériu Interiór Hein Komandu Jerál PNTL Aprezenta Lista Membru Ne’ebé Tama Idade Reforma

Formatira membru Komandu Operasaun Espesiál (COE)-PNTL. Imajen/Rafa.tl

DÍLI, RAFA.tl– Ministériu Interiór hein  Komandu Jerál Polísia Nasionál Timor-Leste (PNTL) atu aprezenta lista membru ativu sira ne’ebé tama ona idade reforma.

Notísia Relevante: Ministru Francisco Guterres: “Ha’u Mak Hasai Despaixu Demoradu Ba Promosaun Diviza Julia da Gama”

Ministru Interiór, Francisco da Costa Guterres, Kuarta (01/04/2026), hateten membru PNTL sira sei reforma obrigatóriu bainhira idade tama tinan 65 no Governu prepara reforma dignu ba sira ho prioridade atu trata membru polísia ho rejime salariál no kondisaun dignu molok reforma.

Francisco Guterres afirma iha artigu 47 estatutu organika PNTL nian kuandu membru ida to’o ona idade ne’ebé defini sei aprezenta ba reforma no kazu ida-ne’e sei la akontese ba Komandante Jerál no Segundu Komandante Jerál hodi hein too sira nia mandatu remata.

“Kuandu Governu deside nomeia nia ba Komandante Jerál no Segundu Komandante Jerál automatikamente reforma ne’e la aplika ba nia to’o nia kumpri nia mandatu tinan-tolu ne’e hotu tiha mak governu haré fali,” Ministru Francisco da Costa Guterres informa ba jornalista sira iha Palásiu Governu.

Governate ne’e esplika Governu prepara sistema atu garante tranzisaun ne’e ho dignidade, inklui benefísiu finansial.

“Lista ne’e ha’u hein Komandante Jerál PNTL haruka mai ha’u iha fulan ida ka rua nia laran, depois maka sei publika, ne’ebé estatutu ne’e dehan fó tinan rua, tanba estatutu reforma ne’e Governu aprova iha tinan 2024,” nia tenik.

Ministru Interiór promete sei la halo intervensaun polítika ba instituisaun PNTL nia servisu, maibe kona-bá servisu ligasaun ho Ministériu Interiór nia parte, Ministeriu Interiór ho Komandu PNTL nafatin kolabora malu.

Kona-bá ierarkia servisu profisionál Komandu PNTL nian tuir regra no lei ne’ebé iha, ne’e desijaun husi Komandante Jerál nian.

Nia  subliña mós kona-bá prosesu ba  re-teste kandidatu Polísia foun hein Páskua hotu hafoin hahú fali re-teste ba kandidatu sira ne’ebé pasa ona selesaun dokumentu hamutuk 12,851.

Reportajen ekipa Rafa.tl