Taça da Liga, Fitun Estudante Lorosa’e F.C iha Ambisaun Manán Coração F.C

Ekipa Fitun Estudante Lorosa'e FC. Imajen/Rafa.tl

DILI, RAFA.tl– Ekipa Fitun Estudante Lorosa’e F.C  iha ambisaun hakarak manán nia adversáriu Coração F.C iha jogu daruak grupu C, Taça da Liga FFTL époka ne’e.

Notísia Relevante: F.C Lica-Lica Lemorai Susesu Halakon Fitun Estudante Lorosa’e F.C ho Skor 3-0

Treinadór ekipa Fitun Estudante Lorosa’e F.C, Hermelo José Pereira Ximenes da Conceição, hatete nia ekipa halao ona preparasaun másimu no garantia  manán Coração F.C hodi ultrapasa ba faze meia-finál Taça da Liga.

“Ha’u nia matéria jogadór nafatin laiha mudansa, ha’u nia jogadór estamina di’ak, iha preparasaun laran, ne’ebé ha’u sente ami prontu joga iha Sábadu (31/01/2026),  kontra Coraҫão F.C,” Hermelo José Pereira Ximenes da Conceição hateten iha  konferénsia imprensa iha Estádiu Munisipál Díli, Kinta (29/01/2026).

Kapitaun ekipa Fitun Estudante Lorosa’e F.C, Eldino Vaz afirma, nia parte sei enkoraja nia jogadór sira hodi esforsu hetan rezultadu pozitivu iha jogu kontra Coraҫão F.C.

“Ami prepara másimu ba jogu kontra Coraҫão F.C. Ami derrota ona, agora jogu tuir mai atu hetan valór pozitivu, ami tenke haka’as aan,” Eldino Vaz afirma.

Iha fatin hanesan, Treinadór Coração F.C, Gaspar Amaral  subliña nia ekipa sei tau atensaun ba jogu iha Sábadu ne’e, atu bele hetan oportunidade hodi rekolla pontu tolu

“Hotu-hotu hanoin hakarak manán, se sira hakarak manán, ami mós tenke kuidadu tanba ho garantia ne’ebé  Fitun Estudande Lorosa’e sira iha signifika sira iha preparasaun di’ak, mas ami mós hakarak  joga ho másimu atu ami bele rekolla pontu tolu,” Gaspar Amaral hateten.

Kapitaun ekipa Coração F.C, Miguel Arcanjo Ximenes “Bojan” hatutan nia ekipa  esforsu hodi hatudu jogu ne’ebé di’ak hodi halakon Fitun Estudante Lorosa’e.

“Ami nia preparasaun semana ida, preparasaun ne’ebé mak minimu tanba semana ida ita labele garantia katak másimu, entaun ho preparasaun ne’ebé minimu maibe ha’u fiar katak ami bele halo buat ruma iha jogu kontra Fitun Estudante Lorosa’e FC,” Miguel Arcanjo Ximenes “Bojan” haktuir.

Tuir oráriu jogu daruak entre  ekipa Fitun Estudante Lorosa’e F.C no Coração F.C  sei hala’o iha Sábadu, 30 fulan-Janeiru 2026, iha Estádiu Munisipál Díli.

Notísia Relevante: Coração F.C iha Ambisaun Manán, F.C Portu Taibessi Garante Asegura Pontu Tolu

Reportajen ekipa Rafa.tl