Hahú Loron 02 fulan-Outubru, Lisensa Operasionál Ba Empreza Jogu Online Sira Kaduka no Invalidu

Inspetór Jerál Jogu, Anibal Carvalho Martins hamutuk ho reprezentante PNTL no PCIC halo konférensia imprensa hodi pronúnsia lisensa operasionál ba empreza jogu online sira kaduka no invalidu. Foto/Rafa.tl

DILI, RAFA.tl– Inspesaun Jerál  ba Jogu (IGJ, siglá portugés) ofisialmente anúnsiu ba públiku kanselamentu ba jogu online iha Timor-Leste bazeia ba rezolusaun Konsellu Ministru númeru 54/2025, loron 01 fulan-Outubru no lisensa hotu-hotu ne’ebé empreza sira iha mate ka invalidu hahú Kinta,  02 fulan-Outubru 2025.

Notísia Relevante: Governu Deside Kansela Lisensa Ne’ebé Fó Ba Operasaun Jogu Online iha Timor-Leste

Iha konferénsia imprensa,  Sesta (03/10/2025), iha salaun IGJ Haksolok,  Dili, Inspetór Jerál Jogu,  Anibal Carvalho Martins,  haktuir ba desizaun Konsellu Ministru ne’ebé halo ona iha loron 01 fulan-Outubru, kona-bá kanselamentu ba  lisensa operasaun jogu no aposta online ho razaun ne’ebé alega tuir konteúdu rezolusaun ne’ebé   hotu-hotu asesu, nune’e IGJ nu’udár órgaun reguladór ba atividade jogu iha Timor-Leste hato’o no divulga ba públiku katak hahú loron 02 fulan-Outubru ne’e, laiha tan atividade jogu online iha Timor-Leste.

“Atividade jogu online ne’ebé hala’o liuhosi konsesionária sira taka ona no labele hala’o tan atividade bazeia ba desizaun ne’ebé Governu implementa ona, no sei hetan akompañamentu liuhosi kontrolu no monitorizasaun ne’ebé sei hala’o husi Inspetór  sira husi IGJ hamutuk ho autoridade seguransa sira hanesan PNTL no Polísia Sientifika Investigasaun Kriminál (PCIC, sigla portugés),” Anibal Carvalho Martins informa.

Tuir nia, suspeita ka deskonfia sira ne’ebé maka sai nu’udár razaun iha rezolusaun IGJ asegura no nafatin akompaña ho transparente no profisionál atu evita gtupu ka individu sira uza atividade jogu ba pratika krime.

IGJ ho entidade Polísia sira sempre halo bebeik dezde atividade jogu hahú no sei halo nafatin ba oin. Nune’e mós iha rezolusaun refere ezije revizaun ba Dekretu-Lei ne’ebé regula atividade jogu tanba presiza ona atu reajusta lei refere ba dezenvolvimentu no kreximentu ho modernizasaun sistema no regra jogu iha nivel rejionál no mundiál.

Anibal Carvalho informa IGJ nu’udár membru permanente iha Word Lotery Association (WLA) sempre  troka  informasaun kona-bá “modu operandi” ne’ebé pratika husi grupu krime organizadu iha mundu tomak, liuhosi atividade jogu ne’ebé implementa regra husi IGJ kokona-bá aividade jogu.

IGJ mós la’ós izoladu de’it iha Timor-Leste, maibé mós hetan kooperasaun husi organizasoins internasionál hanesan, organizasaun regional iha Amérika Latina, Corporacion Ibero Americana de lotarias y apuestas de Estado (CIBELAE), ne’ebé IGJ mós iha kooperasaun Santa Casa de Misericórdia de Lisboa, ne’ebé halo mós kooperasaun iha área barak inklui formasaun ba kuadru IGJ nian no troka de informasoins.

Legalizasaun ba jogu online hahú desde VIII Governu Konstitusionál

Lisensiamentu ba atividade jogu online hahú kedas husi VIII Governu Konstitusionál, iha ne’ebé atribui lisensa ba empreza ARL KAPSTAAD, LDA, ho durasaun tinan 10, ne’ebé asina direita husi Prezidénsia Konsellu Ministru VIII Governu Konstitusionál Hermenigildo Augostu Cabral Pereira no empreza Frandes Doutel Unip.Lda ho kontratu durasaun tinan-rua, ne’ebé asina direita husi Ministru Komérsiu Indústria VIII José Lucas do Carmo.

Iha IX Governu Konstitusionál liuhosi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente,  Francisco Kalbuadi Lay fó lisensa ba empreza rua ho durasaun tinan-ida, hanesan provatoriu no maioria lisensa ne’e inválidu ona no ida iha fulan-Fevereiru 2026, maibé ho rezolusaun ne’ebé iha otomatikamente suspende ona.”

IX Governu Konstitusionál iha Seriedade kombate jogu online iha Timor-Leste

IX Governu Konstitusionál, liu husi Primeiru-Ministru Kay Rala Xanana Gusmão no Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay, hamutuk ho membru hotu-hotu, iha kompromisu no seriedade kombate jogu online iha Timor-Leste.

Seriedade governu nian ne’e, hatudu iha aktu provatoriu hodi aprova Rezolusaun Governu númeru 54/2025/ loron 01 fulan-Outubru, ne’ebé aprezenta hosi Ministru Prezidénsia Konsellu Ministrus, Hermenigildo Augostu Cabral Pereira, ne’ebé determina kanselamentu lisensa ne’ebé fó ba operasaun jogu no aposta online.

IGJ mós husu ba sidadaun sira no públiku, hetan ka haree iha atividade jogu online ne’ebé sei sirkula ka la’o iha teritóriu nasionál bele informa ba IGJ no autoridade seguransa liuhosi PNTL no PCIC.

Reportajen ekipa Rafa.tl