PM Xanana Apresia Servisu PNTL Durante Manifestasaun Pasífiku Ne’ebé Organiza husi EUTL

Primeiru-Ministru (PM) Xanana Gusmão halo enkontru ho superiór sira iha PNTL, Tersa (23/09/2025). Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmão, apresia ho servisu Polísia Nasionál Timor-Leste (PNTL) ba hametin estabilidade nasionál no garante seguransa durante manifestasaun pasífiku ne’ebé organiza husi Estudante Universitáriu Timor-Leste (EUTL).

Notísia Relevante: Manifestasaun Loron-Tolu, Polísia ho Estudante Na’in-13 Kanek no Kaptura Na’in-12

Estudante Universitáriu Timor-Leste (EUTL) organiza manifestasaun durante loron-tolu iha Dili, hahú hosi Segunda-Kuarta (15-17/09/2025), HODI ezije Parlamentu Nasionál (PN) la sosa karreta foun, ezije mós halakon Lei Mensál Pensaun Vitálisia no halo revizaun bá Lei Manifestasaun, liuliu artigu ne’ebé kontempladu kona-bá manifestasaun tenke dook metru 100 husi repartisaun Estadu no seluk tán.

Primeiru-Ministru Kay Rala Xanana Gusmão ba jornalista sira iha Kuartél Jerál PNTL, Caicoli, Tersa (23/09/2025),  hateten apresia ho servisu PNTL bá hametin estabilidade nasionál tuir lei no orden ne’ebé konsagra iha Konstituisaun Repúblika Demokrátiku Timor-Leste.

Xefe Governu  apresia bá situasaun seguransa, liu-liu komportamentu Polísia sira nian durante manifestasaun pasífiku ne’ebé Estudante Universitáriu Timor-Leste ka EUTL hala’o iha resintu Universidade Nasionál Timor-Lorosa’e (UNTL).

“Ko’alia deit kona-bá komportamentu Polísia nian durante manifestasaun sira ne’e. Apresia no husu atu sira kontínua hametin sentidu Polísia nian ba estabilidade nasionál,” Primeiru-Ministru Xanana Gusmão hateten.

Xanana dehan, ema hotu-hotu bele manifesta nia hanoin bá buat sira ne’ebé laloos, tanba  nasaun ida-ne’e adopta demokrasia, maibé tenke ho responsabilidade, la’ós atu tuda-malu, no tolok-malu. Tanba ne’e, nia mai ko’alia ho PNTL kona-bá papel polísia nian iha estadu demokratiku nian.

Iha enkontru Xefe Governu ho Ofisiál superiór sira PNTL nian ne’e ko’alia mós kona-ba vizita Primeiru Ministru Malázia, Anwar Ibrahim mai iha Timor-Leste hahú Tersa ohin no Kuarta aban (23-24/09/2025),  inklui vizita ofisiál sira seluk iha fulan-Outubru nia laran, no mós komemorasaun loron istóriku tinan 50 proklamasaun unilateral independénsia Timor-Leste, 28 Novembru 2025.

Iha sorin seluk, Ministru Interiór, Francisco dsa Costa Guterres, informa Primeiru-Ministru mai atu felisita PNTL, tanba halo serbisu ho di’ak no kontínua fó motivasaun atu servisu tuir regra no regulamentu internál polísia nian ne’ebé mak iha, atu nune’e, defende estadu ida ne’e.

“PM Xanana mai hodi kontínua fó hatene ba polísia katak, sira-nia dever mak atu defende estadu no povu ida-ne’e,” Francisco Guterres tenik.

Governante ne’e haktuir, kona-bá deskonfia membru PNTL balun baku estduante sira iha sala laran komandu buka hela no halo hela investigasaun pois mak rona nia rezultadu.

“PNTL mós kontinua buka tuir manifestante sira ne’ebé halo violénsia iha altura ne’ebá hodi sunu karreta estadu, tuda ema kanek no halo anarkizmu tanba ne’e nasaun Demokratiku, direitu demokratiku ne’e bele hato’o imi nia pensamentu, hato’o imi nia hakarak maibe tenke iha korredor legal nia laran, tenke tuir regra demokrasia ne’ebe mak iha,”  Francisco Guterres afirma.

Ministru Interior ne’e subliña Kuandu manifestasaun pasífiku mak uza violensia ne’e krime ne’ebé tenke responsabiliza baáhahalok ne’ebé mak rezulta ema ruma kanek ka bele kria problema bá ema ruma.

Reportajen ekipa Rafa.tl