Xefe Estadu Timorense Kondekora Forsa INTERFET Husi Austrália no Nova Zelándia ho Medalla Solidariedade

Xefe Estadu atribui medalla solidariedade ba forsa INTERFET sira husi Austrália ho Nova Zelándia, Segunda 17 Agostu 2026.

Díli, 17 Agostu 2026 (RAFA)- Xefe Estadu Timorense, José Ramos-Horta, Segunda-ne´e, iha Palásiu Prezidensiál, kondekora  forsa International Force East Timor (INTERFET) husi Austrália no Nova Zelándia ho medalla solidariedade nu’udar rekoñesimentu ba sira nia misaun páz iha Timor-Leste durante períodu 1999-2001.

“Ha’u kondekora  sira elementu forsa INTERFET 1999-2001 tanba primeiravez mak sira mai. Primeiravez mak identifika sira, sira husu se bele kondekora sira medalla simples, medalla solidaridade ne’ebé uluk iha ha’u nia primeiru mandatu fó ba  militár ONU nian, ema lubuk ida, rihun ba rihun,”  Prezidente Repúblika, José Ramos-Horta esplika.

Xefe Estadu konfirma katak, elementu sira ne’e tinan sira nia laran  nunka hetan rekoñesimentu. Ba sira hanesan lembransa ida, medalla solidaridade, entaun sira husu se bele. Tanba balun uluk sira iha ne’e fulan neen no troka malu too tinan-rua.

Ramos-Horta haktuir grupu ne’e sei halo parte grupu boot veteranu sira 1999 to’o 2012 tanba depois INTERFET, Nasaun Unidas, Militár  Austrália, Nova Zelándia sira fila-fali mai iha ne’e 2006 to’o 2012.

Nia hateten ema husi Austrália, Nova Zelándia ne’ebé serbí iha Timor-Leste, tempu ne’eba rihun ba rihun. Maibé, sira mai kada tinan dala-tolu ka dala-haat, grupu ida kompostu husi ema na´in-30, sira viajen Timor-Leste tomak, sira ajuda halo eskola, halo ema nia uma sira, mobiliza finansiamentu Austrália. Ema sira ne’e influénsia boot liu husi sira nia média sosiál hatutan to’o ema rihun ba rihun akompaña Timor-Leste.

“Agradese ba sira, ba sira nia governante sira, ha’u agradese ba sira. Sira haré ho sira nia matan, tanba sira uluk iha ne’e, balun mai dala tolu, haat, lima tiha ona, sira hatete, sira haré tinan-tinan Timor-Leste muda ba di’ak,” Xefe Estadu haktuir.

Prezidente Repúblika informa tan katak, ema  sira ba vizita rai barak, mais iha Timor mak sira haré ba labarik sira sempre hamnasa, populasaun mós sempre simpátia simu di’ak, sira gosta loos mai ne’e. Tanba, povu, joven, labarik sira sai hanesan promosaun di’ak liután ba Timor, tanba sira hotu-hotu fila ho simpátia ba labarik no populasaun, ema hotu-hotu sempre hamnasa.

Jornalista: Cristina Ximenes