Xanana Prontu Enfrenta Ligthouse Corporation iha Tribunál Austrália

PM Kay Rala Xanana Gusmão

Díli, 08 Abríl 2026 (RAFA.tl)- Primeiru-Ministru (PM), Kay Rala Xanana Gusmão deklara prontu enfrenta Lighthouse Corporation Pty Ltd and Lighthouse Corporation Ltd, IBC iha Tribunál arbitrajen iha Austrália hodi defende interese no soberánia Estadu Timor-Leste.

Entre  fulan-Setembru ka fulan-Outubru 2026, Primeiru-Ministru Kay Rala Xanana Gusmão sei ba hatán iha Tribunál Arbitrál iha Austrália kona-bá Empreza internasionál Lighthouse Corporation Pty Ltd no Lighthouse Corporation IBC, ne’ebé reklama (ezije) Governu Timor-Leste selu prejuízu ho montante millaun US$600 bainhira sira manán iha Tribunál arbitrál iha inísiu tinan 2026.

“Ha’u sei ba hatán iha fulan-Setembru ka fulan-Outobru 2026, maibé ha’u atu dehan de’it katak ema nia aman ida kaer Ligthouse ne’e tinan rua ba kotuk, Governu Austrália no povu tomak foti nia hanesan maior fraudulentu (bosok ten nia boot) iha Austrália,” Xanana Gusmão hodi responde jornalista sira iha Palásiu Prezidensiál, Kinta (09/04/2026).

Primeiru-Ministru Kay Rala Xanana Gusmão ba jornalista sira hafoin remata sorumutu semanál ho Prezidente Repúblika José Ramos-Horta iha Palásiu Prezidensiál Nicolau Lobato Bairu-Pite, Díli, Kinta (09/04/2026),

Xefe Governu ne’e haforsa, tinan haat ba kotuk, ema ne’ebé kaer kompañia Ligthouse Corporation ne’e konsideradu hanesan maior fraudulentu iha Austrália, se ema tau ona hanesan ne’e, sira seluk ezize nafatin, ne’ebé sei ba responde katak Timor-Leste foin ukun aan, IV Governu mós forma no ema haré katak buat sira ne’e la’o ona, presiza eletresidade buat sira ne’e hotu, hodi haruka ona ema halo estudu no kompañia Lighthouse Corporation Pty Ltd and Lighthouse Corporation Ltd, IBC mai halo servisu laiha kontratu ikus mai iziji Governu atu selu.

“Problema ne’e ha’u la ta’uk, ba kadeia mós ba de’it, tanba ha’u ba tiha ona kadeia dala-rua, mas ba atu hasoru kompañia ida ne’ebé maior fraude iha Austrália ne’e sei ba,” Xanana Gusmão subliña.

Sita husi pájina ofisiál Governu Timor-Leste nian edisaun, loron 06 fulan-Dezembru tinan 2019, katak disputa entre empreza fornesimentu kombustível no jeradór Lighthouse  ho Governu Timor-Leste ne’e iha relasaun ho eventu sira mak mosu iha Timor-Leste iha tinan 2010 no 2011, kona-bá kontratu fornesimentu kombustível no jeradór sira ba eletrisidade Timor-Leste (EDTL).Governu Timor-Leste nian fiar-aan katak la iha kontratu ida mak vinkulativu ne’ebé mak asina tiha ona.

Iha prosesu ne’ebé empreza Lighthouse lori ba Tribunál Supremu Victória-Austrália, reklama kompensasaun millaun US$600 bainhira sira manán iha prosesu ne’e kontra Governu Timor-Leste.

Iha prosesu disputa ne’ebé sei deside husi Tribunál Supremu Victória iha tinan 2026 mai ne’e,  reprezentante povu iha Parlamentu Nasionál husu Governu Timor-Leste tenke defende aan no defende dignidade Estadu, nune’e bele manán no labele fó prejuizu ba Estadu.

Jornalista: Élio dos Santos/Editór: Vito Salvadór