Xanana Gusmão Informa Ba Xefe Estadu Kriasaun Komisaun Instituisionál Kombate Krime Sibernétika no Scam Call Centre iha Timor-Leste

PM Kay Rala Xanana Gusmão.

Díli 21 Agostu 2026 (RAFA)- Primeiru Ministru, Kay Rala Xanana Gusmão Sesta-ne’e, iha Palasiu Prezidensiál, informa ba Xefe Estadu kona-bá politika no planu Governu nian hodi kria komisaun institusionál ida atu haré ba problema ida sibernétika no Scam Call Centre iha Timor-Leste.

“Ha’u informa ba Prezidente Repúblika katak, iha Konsellu Ministru, semana kotuk, kria ona komisaun ida institusionál atu haré ba problema ida sibernétika, Scam Call Centre, buat sira ne’e hotu. Buat ne’e sei mai mais, ami buka daudauk atu hatudu ba sira katak, buat ne’e labele akontese iha ne’e, liu-liu uza osan ba iha li’ur, mais ita sai fali paraizu ida ba buat ne’e,” Primeiru Ministru, Kay Rala Xanana Gusmão hateten.

Xefe Governu informa mós katak, Embaixada Xina mós agradese, Embaxada Kambodia buat sira ne’e hotu, sira agradese atensaun boot ida ne’ebé tau ba iha problema ida ne’e.

“Ha’u informa mós ba Prezidente Repúblika katak, ami iha hela Orsamentu Jerál Estadu. Atu hadia tiha problema ida kona-bá hatama de’it, laiha vizaun anual nian, ne’e mak ami hala’o hela, mais klaru ita hotu hatene, hotu-hotu hakarak halo buat ne’e mós la’o ladun,” Xanana hateten.

Primeiru-Ministru Informa mos ba Xefe Estadu kona-bá nia observasaun ba infraestrutura ne’ebé hala’o daudauk, maibé seidauk hotu, haré katak se bele karik to’o iha tinan ikus ne’e, buat sira ne’e atu hotu tiha.

Ko’alia mós kona-bá CPLP sira kontente, sira mós apresia tebe-tebes Timor-Leste nia preparasaun ho lojistika buat sira ne’e hotu.

“Ho Embaixadór Cavo-Verde nia temi katak, sira mós hakarak loke Embaixada ida iha ne’e. Ne’ebé nia mós oferese dehan iha área justisa, edukasaun, área seluk sira bele fó apoiu. Ha’u dehan tiha ona katak, depois sei haruka tékniku sira ba haré saida mak ita bele hahú kooperasaun di’ak ida ho Cavo-Verde,” Xanana esplika.

Xanana Gusmão informa mós katak, iha sorumutu ho Ministru Negósiu Estranjeiru Portugál sei buka haka’ás aan atu asistensia ne’ebé Portugál  fó iha área direitu. Tanba joven lubuk iha Portugál ona, estuda daudauk, sira mós atu tama kona-ba Eskola Portugeza ne’ebé atu harii iha Caicoli ne’eba ne’e,  sira mós sei haré ida ne’e.

Jornalista: Cristina Ximenes