VPU Husu Governu Kria Sentru Eskola Ba Labarik Sira Fa’an Sasán iha Dalan Ninin

Labarik sira fa'an sasán iha dalan ninin. Imajen/dok.

Díli, 02 Setembru  2026 (RAFA)- Polísia Nasionál Timor-Leste (PNTL) liuhosi Xefe Seksaun Prevensaun, Sosializasaun no Sensibilizasaun Departamentu Apoiu Pesoal Vulneravel (VPU) Inspetór Xefe Polísia, Ricardo da Costa husu governu kria sentru eskola ida bá labarik sira fa’an sasán iha estrada ninin hodi evita labarik sira ne´e para eskola nune´e sira bele kontinua estudu tuir nivel edukasaun ne´ebé iha.

Inspetór Xefe Polísia Ricardo da Costa hatete, ekipa task-force interministerial kria atu implementa lei kona-bá protesaun labarik no joventude. Ekipa ne’e halo intervensaun hodi rekolla labarik sira ne’ebé fa’an  sasán iha Timor Plaza ka iha estrada ninin no entrega fila fali ba inan-aman.

“Ida ne’e ita kria ekipa taks-force ida interministerial hotu para atu implenta lei protesaun labarik no lei ba joventude sira ne’e, ita rekolla labarik sira barak iha Timor Plaza ka Leader nia oin no fatin sira ne’ebé mak rame iha plaza laran, maibé ita lori labarik sira ne’e ba entrega fila-fali ba sira nia inan aman”, Xefe Seksaun Prevensaun, Sosializasaun no Sensibilizasaun Departamentu apoiu VPU Nasionál, Inspetór Xefe Polísia Ricardo da Costa ba Jornalista sira iha Díli, Tersa foin lalais ne’e.

Inspetór Xefe Polísia Ricardo da Costa, haktuir  Institutu Nasionál Defeza Direitu bá Labarik (INDDICA-sigla portugés) mós halo hela ninia knar lubuk ida labarik barak maka sira halo asismentu mak problema, tanbasá mak la eskola iha parte finansial balun entaun sira rekomenda ba edukasaun buka fatin ba labarik sira ne’e hodi eskola.

Nia hatutan, problema bá labarik sira kontinua fa’an iha estrada ninin susar uituan atu halo prevensaun, tanba ne’e  husu Governu tenke kria sentru eskola ida atu nune’e bele akomula labarik sira ne’ebé vulneravel hodi kontinua sira nia estudu.

“Problema ida-ne’e ita haree bá susar uituan atu prevene, tanba ne’e mak ha’u nia hanoin Governu tenke kria sentru ida, para ekipa taks-force ba foti labarik sira fa’an sasán iha estrada ibun ne’e  lori kedas ba iha sentru,” Inspetór Xefe Polísia Ricardo da Costa rekomenda.

Ekipa konjunta ne´ebé bolu labarik sira fa’an ne’e intensaun atu motiva labarik sira ba fali eskola, tanba ne’e kria sentru ida tau mestre iha sentru ne’e ho nia kurikulu hanesan iha eskola sira seluk hodi labarik sira bele kontinua eskola fali. Horas eskola sai iha tempu lokraik para sira la iha ona tempu  para kontinua fa’an iha estrada ninin.

Autoridade seguransa ne’e afirma, dala barak labarik sira iha risku laran, tanba iha Leader oin parte semafro nian kuandu ema ne’ebé hola manu-tolun la konsege selu mak lampu matak mosu, karreta halai labarik sira tabele tuir husi kotuk bele hamosu dezastre.

“Tanba oin atu kontrola labarik sira husi inan-aman, komunidade no estadu, entaun ema sira ne’ebé mak para karreta iha fatin ruma, hanesan iha semafro mak labarik sira fó sasán mak sira sosa karreta ka motor sira iha nia kotuk hasai ninia foto, karreta ne’e nia foto lori mai iha Polísia bá halo identifikasaun karreta nia plat ne’e sé mak lori karreta ne’e, ita labele sosa hela de’it sasán iha labarik sira la’o iha dalan ne’e”, Inspetór Xefe Polísia Ricardo da Costa informa.

Autoridade seguransa VPU husu komunidade no inan-aman sira nafatin halo kolaborasaun hodi prevene labarik sira fa’an iha estrada ninin. Nune’e husu ba komunidade sira atu labele sosa sasán husi labarik sira ne’ebé fa’an iha estrada públiku iha Dili laran.

Jornalista: Juvinal Cabral dos Santos