Vise-Sekretáriu Jerál ASEAN Kontinua Koopera ho MNEK Hodi Hametin Asuntu Seguransa no Polítika

Ministru Negosiu Estrájeniru no Kooperasaun (MNEK), Bendito dos Santos Freitas, hala'o enkotru ho Vise-Sekretáriu Jerál ASEAN ba Komunidade Polítika Seguransa (APSC), Astanah Abdul Aziz, Kinta 30 Jullu 2026.

Díli, 30 Jullu 2026 (RAFA.TL)- Ministru Negosiu Estrájeniru no Kooperasaun (MNEK), Bendito dos Santos Freitas, Kinta-ne’e,  hala’o enkotru kortejia  ho Vise-Sekretáriu Jeral ASEAN ba Komunidade Polítika Seguransa (APSC), Astanah Abdul Aziz, hodi hametin kooperasaun servisu ne’ebé kabe ba polítika no seguransa nian.

Vise-Ministra ba Asuntu ASEAN, Milena da Costa Rangel  ne’ebé hola parte iha enkontru kortejia ne’e, relata katak Vise-Sekretáriu Jerál ASEAN Astanah Abdul Aziz hetan konvite mai iha Timor-Leste atu bele hametin kooperasaun servisu, liu-liu ba ministériu no ajensia  sira ne’ebé maka kabe ba iha polítika seguransa nian atu bele dezenvolve planu sira ba implementasaun tinan-10.

“Ita maka konvida duni haré servisu sira ne’ebé bele halo hamutuk agora to’o ba iha Prezideénsia ASEAN iha tinan 2029,”  Vise-Minitra Asuntu ASEAN informa.

Husi parte Sekretáriu ASEAN oferese sira nia  apoiu tomak, iha área hotu-hotu tanba ne’e maka koordenasaun ne’e hahú husi agora ba preparasaun Timor-Leste nia prezidénsa ba ASEAN iha tinan 2029.

Iha fatin hanesan Vise-Sekretáriu Jerál ASEAN, Astanah Abdul Aziz informa nia parte hetan konvite husi MNEK atu bele  diskute asuntu seguransa no polítika ho ministériu hotu ne’ebé maka responsabiliza ba asuntu seguransa no polítika  inklui mós ajénsia sira.

Bazeia ba enkotru ida ne’e Vise-Sekretáriu ASEAN ho nia delegasaun sira realiza hela formasaun tékniku ba ministériu hotu-hotu ne’ebé maka  responsabiliza ba asuntu seguransa no polítika iha Timor-Leste durante loron tolu, hahú husi loron 30 fulan-Jullu to’o loron 01 fulan-Agostu, tinan ne’e, iha Salaun Nobre Ministeríu Negosiu Estránjeiru no Kooperasaun.

Jornalista: Remigia Locatelli