Vise-Primeiru-Ministru Francisco Kalbuadi Lay Konsidera Timor-Leste Lakon Ema Di’ak ida “Maun Lú-Olo”

Vise-Primeiru-Ministru no Ministru Koordenadór Asuntu Ekonómiku, Ministru Turizmu no Ambiente nu'udao mós Sekretáriu Jeral Partidu CNRT, Francisco Kalbuadi Lay, presta omenajen ba Saudozu Francisco Guterres "Lú-Olo, Kinta 25 Juñu 2026.

Díli, 25 Juñu 2026 (RAFA.TL)- Vise-Primeiru-Ministru no Ministru Koordenadór Asuntu Ekonómiku, Ministru Turizmu no Ambiente, Francisco Kalbuadi Lay, afirma Timor-Leste lakon ema di’ak ida, maun Lú-Olo ne’ebé kontribui ba Timor-Leste desde tempu luta to’o konstrusaun estadu Repúblika Demokratika Timor-Leste (RDTL).

“Lori Governu nia naran no nu’udar Sekretáriu-Jerál Partidu CNRT nian, hamutuk ho lideransa no estrutura organizasionál tomak, ha’u hato’o ha’u-nia kondolénsia kle’an ba família enlutada, Komité Sentrál FRETILIN, Sekretáriu-Jerál, no organizasaun tomak. Timor-Leste lakon ona ema di’ak ida, Irmaun Lú-Olo,” Vise-Primeiru-Ministru Francisco Kalbuadi Lay  haktuir ba jornalista sira hafoin presta omenajen ba Saudozu Lú-Olo iha Farol,  Kinta (25/06/2026).

Francisco Kalbuadi Lay ne’ebé foin fila husi vizita servisu ba Portugal hamutuk ho PM Xanana Gusmão, haktuir nia koñese Saudozu dezde Saudozu fila hosi ai-laran; moris hamutuk ho saudozu durante tinan barak. Tamba ne´e ho saudozu nia partida hanesan lakon no Timor-Leste lakon ema di’ak ida.

“Mai ita reza atu Maromak haraik ba nia fatin deskansa dignu no dame, no apoia família ida-ne’e, fó forsa ba sira atu nia oan sira ne’ebé agora daudaun estuda hela bele hetan edukasaun ne’ebé di’ak no lori ba oin sira-nia aman nia legadu. Saudozu Lú-Olo la hamutuk ona ho ita fizikamente, maibé nia espíritu hamutuk nafatin ho ita, Obrigado Lú-Olo,” Francisco Kalbuadi Lay akresenta.

Vise-Primeiru-Ministru ne’e relembra oinsá saudozu Lú-Olo nia dedikasaun ba nasaun no hanoin hikas sira-nia tempu hamutuk dezde 1999 ho Sekretáriu-Jerál Mari Alkatiri, liuhosi formasaun Asembleia Konstituinte, bainhira saudozu sai Prezidente Asembleia nian. Tuir mai, eleitu nu’udar Prezidente Repúblika. Saudozu dedika nia vida tomak ba nasaun ida-ne’e no nia povu. saudozu ema ida ne’ebé divertidu; bainhira hamutuk, nia gosta múzika no sempre toka.

“Ha’u sente lakon boot ba ema ida ne’ebé ha’u koñese di’ak tebes,” nia subliña.

Prezidente Paritdu FRETILIN no Eis Prezidente Repúblika Saudozu Francisco Guterres “Lú-Olo” mate ho tinan 71, iha Ospitál Prince Court iha Kuala Lumpur, Malázia iha tuku 22:00 oras Malázia  iha Domingu 21 Juñu 2026. Saudozu mate husik hela nia kaben Dona Cidália Lopes Nobre Mouzinho Guterres ho oan na´in-haat, mane na’in-tolu no feto ida: Francisco Cidalino Nobre, Nobrezino Guterres, Samd no Dália Luliana Nobre Guterres.

 Jornalista: Elio dos Santos/Editór: Vito Salvadór