Vise-PM Mariano Assanami Husu Povu Tau Nafatin Konfiansa Ba Ospitál iha Rai-Laran

Vise-Primeiru-Ministru Mariano Assanami.

Díli, 13 Agostu 2026 (RAFA)— Ministériu Saúde kontinua esforsu  mellora sistema no servisu  ospitál no sentru saúde sira iha teritóriu Timor-Leste, tanba ne’e, Vise-Primeiru-Ministru (PM) no Ministru Koordenadór Asuntu Sosiais, Mariano Assanami Sabino husu povu kontinua tau nafatin konfiansa  ba iha ospitál sira iha rai-laran.

Vise-Primeiru-Ministru Mariano Assanami hato’o mensajen relasiona ho lamensoins públiku nian kona ba atendementu no menus fasilidade iha ospitál nasonal, ospitál referral no sentu saúde to’o postu saúde  sira.

“Ha’u orienta  no kombina hela ho Ministériu Saúde tanba sira mak iha kompeténsia liu atu haré oinsá bele la’o ho di’ak. Mais, ita esforsu para ita-nia ospitál tenke sai fali konfiansa ba ita-nia inan-aman sira para ba iha ne’ebá no  mós sai fatin salva ema nia vida,”Mariano Sabino hateten, Kinta-ne’e.

Nia dehan, nu’udár Ministru koordenadór sempre orienta nafatin ba iha Ministériu Saúde i agora iha ona konkordansia oinsá atu rezolve problema saúde sira.

Governu mós iha ona planu atu tau orsamentu boot ba setór saúde iha tinan oin tanba ema mak futuru nasaun nian. Ne’e duni, Mariano Assanami Sabino dehan tinan oin, orsamentu ba moras boot hanesan lepra, TBC no HIV/SIDA, sira koloka ona osan hira  presiza atu tau. Maibé,  normálmente osan ba saúde tenke tau osan boot.

Vise-Primeiru-Ministru mós hateten  Governu konsidera importante atu uza teknolojia médika moderna liuhosi modelu kooperasaun ho setór privadu no Estadu.

“Agora ita  konsentra atu aselera, ita mós kordena ho Ministériu Saúde atu iha mós modelu privadu mai servisu hamutuk ho Estadu, para ita haré katak bainhira iha difikuldade duni, ita tenke haruka ba li’ur, maibé iha futuru ita bele haruka de’it ba Lahane,” Vis- PM afirma.

Nia mós propoin atu konsidera modelu ne’ebé kompaña sira bele fornese no atualiza ekipamentu médika ho teknolojia foun, hodi evita Governu tenke sosa ekipamentu foun kada teknolojia muda.

Mariano Assanami Sabino mós orienta ba Ministériu Saúde no Vise-Ministru Saúde sira atu haré ho detallu nesesidade ekipamentu ba klinika no unidade saúde sira hotu, atu nune’e, sistema saúde nasional bele kontinua hetan melloramentu no akompaña dezenvolvimentu teknolojia médika moderna.

Jornalista: Cesarina de Carvalho