Noticias

UNTL Propoin Ba MESSK Simu Estudante Foun 4060 iha 2027

todayNovember 16, 2026 68

Background
share close

Díli, 16 Novembru 2026 (2026) – Universidade Nasionál Timor Lorosa’e (UNTL) propoin ba Ministériu Ensinu Superiór, Siénsia no Kultura (MESSK) atu rekruta estudante foun hamutuk na’in-4060 ba tinan akadémika 2027.

Vise-Reitór Asuntu Akademiku iha UNTL, Câncio Manteiro informa katak kada tinan UNTL sempre hato’o proposta tanba MESSK mak iha kompeténsia atu rekruta estudante foun, liuhusi Komisaun Asesu Ensinu Superiór (CAES).

“Ita hato’o  vaga ba estudante foun husi departementu hotu-hotu propoin vaga  mai iha pontu importante rua, dahuluk tenke haree kondisaun fasilidade sala-de-aula no fasilidade sira seluk, no daruak tenke haree mós disponivelidade rekursu umanu dosente sira,” Vise Reitór Câncio Manteiro hateten ba  jornalista sira, iha kna’ar fatin kampus sentral UNTL, Segunda-ne’e.

Nia dehan, bazeia ba análize hirak ne’e mak UNTL propoin estudante hamutuk 4060, ne’e inklui ona departementu foun Istória no Sosiolojia ne’ebé sei halo operasaun iha tinan oin.

Dadaun, nia dehan, UNTL servisu hamutuk ho MESSK halo sosializasaun entermu vaga no rekezitu sira ba estudante ne’ebè atu asesu ba ensinu superiór.

“Atividade ne’e ita hala’o ona iha Fulan-Outubru, dadaun iha hela prosesu rejistrasaun ba rejime espesial no oportunidade, nune’e tuir ajenda ne’ebé ami iha exame sei akontese iha inisiu fulan dezembru,” tenik  Câncio Câncio Manteiro.

UNTL mós simu pedidu husi eskola balun iha Maliana, atu halo sosializasaun direita ba sira nia eskola.

Kona-bá vaga ba estudante ho ema difisiensia, nia dehan, UNTL laiha vaga ba ema ho difisiensia, maibé iha mak persentajen ba rejime espesial.

“Ita laiha vaga sertu ba ema ho difisiensia, maibe ita iha mak persentajen ba rejime espesial  kuaze 30%, ida ne’e inklui ona ema ho difisiensia, maibé komforme ba ema atu aplika kalae,”  Câncio Manteiro subliña.

Iha fatin hanesan, Reitór Universidade Nasionál Timor Lorosa’e (UNTL), Joviano António da Costa, afirma bazei ba kondisaun ne’ebé UNTL iha propoin ona, maibé dalaruma situasaun muda bele sai tiha 5.000.

“Ita bele dehan katak dadus ne’e la permanente, bele aumenta no hatun,” hatete Reitór UNTL ne’e.

Kona-bá infraestrutura, nia dehan, Infraestrutura fiziku ida rua mak la di’ak, maibé seluk kuaze di’ak, atu akumula estudante sira ba tuir prosesu aprendizajen.

Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!