Noticias

Universidade Tenke Prodús Rezultadu La’ós Transmite De’it Koñesimentu

todayNovember 10, 2026 21

Background
share close

Díli, 10 Novembru 2026 (RAFA) –Universidade la’ós fatin atu transmite koñesimentu teóriku de’it, maibé tenke iha kapasidade atu prodús rezultadu peskiza, solusaun no inovasaun ne’ebé bele fó impaktu direta ba dezenvolvimentu sosiedade no nasaun.

Mesajen ne’e hato’o husi  Reitór Universidade Nasionál Timor Lorosa’e (UNTL), Joviano António da Costa, Tersa ne’e, bainhira avertura 1.º Semináriu Interdisiplinár Programa Pós-Graduasaun no Peskiza UNTL, ho objetivu atu aprezenta artigu sientífiku, fahe esperiénsia no promove diálogu entre área koñesimentu oioin.

Liu husi semináriu ne’e, Reitór Joviano António da Costa haktuir atividade ne’e sai hanesan inísiu ba tradisaun akadémika ne’ebé bele hametin atividade peskiza, enkoraja kolaborasaun interdisiplinár no valoriza kontribuisaun sientífika UNTL nian ba dezenvolvimentu nasionál.

“Tema sira ne’ebé aprezenta iha semináriu ne’e kobre área oioin, inklui enerjia, infraestrutura, saúde, edukasaun, polítika públika, kultura no dezenvolvimentu komunitáriu,” Retór UNTL ne’e informa ba jornalista sira, iha auditóriu Fakuldade Ekonómia, Tersa-ne’e.

Nia afirma katak maioria peskizadór sira ne’ebé aprezenta rezultadu peskiza mak estudante pós-graduasaun, liuliu sira ne’ebé tuir programa mestradu iha UNTL no besik atu finaliza sira-nia estudu.

Tuir Retor UNTL katak  rezultadu peskiza hirak-ne’e bele sai kontribuisaun importante ba entidade relevante sira, hodi apoia prosesu foti desizaun no halo.

Nia enkoraja peskizadór no estudante pós-graduasaun sira atu kontinua hala’o investigasaun ho rigor, kriatividade no sentidu responsabilidade.

Iha fatin hanesan Estudante finalista pós-graduasaun husi Fakuldade Enjenaria, Siénsia no Teknolojia UNTL, Zacarias Bosco, konsidera katak atividade ne’e sai oportunidade importante ba estudante mestradu sira atu aprezenta rezultadu peskiza ne’ebé sira hala’o.

“Ami nia peskiza liga liu ba setor infraestrutura hanesan estrada, kondisaun ospitál, enerjia ne’ebé konsumu, presu tarifa ne’ebé ita enfrenta, atu fo rekomendasaun ba ema ne’ebé foti desizaun atu bele fo solusaun ba ita nia sosiedade,” tenik Estudante finalista ne’e.

Nia esplika katak peskiza sira-ne’e elabora bazeia ba kondisaun reál no kontestu Timor-Leste nian. Maibé, mós uza referénsia internasionál hodi reforsa análize no rezultadu peskiza.

“Ami la’ós de’it aprezenta peskiza, maibé ami mós fornese solusaun balun, liuliu rekomendasaun sira ba ita nia Governante sira atu bele haree ba kada situasaun ne’ebé ami peskizadór sira halo,” subliña Zacarias Bosco

Kona-bá durasaun peskiza, Estudante finalista ne’e afirma katak tempu ne’ebé presiza depende ba natureza peskiza ida-idak, maibé bele to’o máximu tinan ida.

Maski nune’e, nia admite katak iha prosesu peskiza, peskizadór sira hasoru difikuldade, liuliu kona-ba asesu ba dadus primáriu ne’ebé seidauk konsentra iha fatin ida. Tanba ne’e, sira tenke halo levantamentu direta ba entidade relevante sira atu buka informasaun ne’ebé presiza.

 Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!