UNODC Alerta Infiltrasaun Grupu Krime Organizadu Transnasionál iha Investimentu iha RAEOA

Notifikasaun no alerta husi Gabinete UNODC bá Sudezte Áziatiku no Pasifiku. Imajen/Repro.UNODC

DILI, RAFA.tl– Gabinete Nasoins Unidas nian kona-bá Droga no Krime  (UNODC/United Nations Office on Drugs and Crime), alerta no  destaka infiltrasaun iha Rejiaun Administrativa Espesiál Oé-Cusse Ambeno (RAEOA) hosi grupu krime organizadu transnasionál sira liuhosi Investimentu Estranjeiru Diretu Kriminozu (FDI, sigla inglés), operasaun intelijénsia no aplikasaun lei Timor-Leste nian hasoru entidade sira iha RAEOA.

Notísia Relevante: Tribunál Aplika Prizaun Preventiva Bá Arguido sira Jogu Online

UNODC maka ajénsia ONU nian ne’ebé nia mandatu prinsipál maka atu kombate tráfiku droga, krime organizadu transnasionál, korrupsaun no terorizmu liuhosi tulun nasaun sira iha implementasaun konvensaun internasionál sira no dezenvolve lejislasaun nasionál no estratéjia kooperasaun nian.

Iha notísia ne’ebé Rafa.tl asesu husi  www.unodc.org, Sesta (12/09/2025),  revela análize ba informasaun no investimentu sira ne’ebé relasiona ho Rejiaun Administrativa Espesiál iha indikasaun kona-bá atividade fraude sira, inklui kartaun SIM no dispozitivu internet satélite ne’ebé prende iha otél ida ne’ebé lokaliza iha RAEOA.

Iha UNODC nia análize katak operasaun sira-ne’e iha ligasaun ho entidade sira ne’ebé asosiadu ho kriminozu sibernétiku sira ne’ebé hetan kondenasaun, operadór sira jogu nian iha tasi-laran, no rede sira ne’ebé iha ligasaun ho triada.

Ho konxiénsia no komprensaun ne’ebé aumenta kona-bá sentru sira bosok nian no atividade kriminál sira ne’ebé relasionadu, presaun hosi aplikasaun lei nian aumenta maka’as iha Sudeste Aziátiku tomak, hodi halo difisil liután ba grupu krime organizadu sira atu hala’o operasaun iha área sira ho fatin tradisionál.

Nu’udar rezultadu, sindikatu sira ativamente kria avenida sira hodi habelar operasaun sira ba jurisdisaun foun sira ho esperiénsia limitadu iha resposta sira sentru estafa nian, inklui Timor-Leste.

Grupu kriminozu sira esplora hela empreza sira, servisu profisionál sira, no pasaporte oioin hodi evita deteksaun, enkuantu inkorpora operasaun ilísitu sira iha kuadru investimentu lejítimu sira. Tendénsia ida-ne’e subliña reziliénsia no adaptabilidade hosi indústria sentru estafa nian no risku sira ne’ebé mosu bainhira ekonomia emerjente sira sai alvu.

Enkuantu Timor-Leste prepara atu adere ba ASEAN iha tinan ne’e nia rohan (26 Outubru 2025), salvaguarda ninia sistema ekonómiku no dijitál hasoru infiltrasaun husi krime organizadu sei sai krítiku atu proteje seguransa no prosperidade husi ninia sidadaun no povu iha rejiaun ASEAN tomak.

UNODC  haree katak dezenvolvimentu sira iha RAEOA mós destaka ameasa hosi sindikatu kriminozu sira ne’ebé estratéjikamente muda sira nia foku bá jurisdisaun sira ne’ebé ladún preparadu atu hasoru dezafiu sira hanesan ne’e, no uza investimentu estranjeiru diretu hodi tama no opera iha jurisdisaun sira ho limiar ki’ik iha rejiaun no liután.

Fó hanoin fali katak iha Segunda-feira, 25 fulan-Agostu tinan 2025,  haleu tuku 21:00 Oras Timor-Leste, ekipa konjunta kompostu husi Serbisu Nasionál Intelejénsia (SNI) ho Polísia Siéntifika Investigasaun Kriminál (PCIC, sigla portugés), halo buska no apreensaun iha Otél Oe-Upu ne’ebé deskonfia hala’o atividade jogu online.

Informasaun ne’ebé kontribuidór Rafa.tl rekolla iha Otél Oe-Upu, Rejiaun Administrativa Espesiál Oé-cusse Ambeno (RAEOA) katak to’o Tersa-kalan (26/08/2025), autoridade sira SNI ho PCIC  kontínua halo buska, apreensaun no detesaun bá sidadaun lokál balun no sidadaun estránjeiru liu ema na’in-10 ho nasionalidade Indonézia, Malázia no Singapura tanba deskunfia envolve iha atividade jogu online ne’e rasik.

Ekipa SNI ho PCIC konsege halo apreensaun bá prova ka evidénsia balun, hanesan telefone  husi jestór no traballadór sira, ho mós  sistema aplikativu jogu online  nian.

Parte autoridade sira SNI ho PCIC kontínua identifika bá pesoál ka traballadór sira, tantu Timoroan  no estranjeiru  sira, ne’ebé deskonfia hola parte iha jogu online ne’e.

Informasaun ne’ebé iha mós katak sidadaun estranjeiru sira  balun viola vistu, tanba utiliza hela vistu turista, maibé hala’o servisu hanesan traballadór iha fatin jogu online ne’e.

Notísia Relevante: SNI-PCIC Buska Fatin Ne’ebé Deskonfia Loke Jogu Online iha Otél Oe-Upu

Reportajen ekipa Rafa.tl