Tsuneishi Timor Shipbuilding Sei Konstrui Estáleiru iha Timor-Leste

PR José Ramos-Horta hala'o sorumutuk ho joven no traballadór Timoroan sira ne’ebé empreza Tsuneishi Timor Shipbuilding, Unipesoal,Lda rekruta atu servisu iha konstrusaun estáleiru iha Timor-Leste.

Díli, 10 Juñu 2026 (RAFA.TL)- Prezidente Repúblika, José Ramos-Horta husu ba IX Governu Konstitusionál fó apoiu másimu ba kompañia husi Japaun, Tsuneishi Timor Shipbuilding, Unipesoal,Lda, ne’ebé iha planu  konstrui estáleiru iha Timor-Leste.

Liuhosi sorumutuk ho joven no traballadór Timoroan sira ne’ebé empreza Tsuneishi Timor Shipbuilding, Unipesoal,Lda rekruta atu servisu iha konstrusaun estáleiru iha Timor-Leste, Kuarta (10/6/2026), Xefe Estadu Timor-Leste, hato’o nia apoiu 100% ba projetu ida-ne’e tanba di’ak ba futuru rai ida-ne’e nian.

“Ha’u agradese ba Embaixada Japaun iha Timor-Leste no kompaña Tsuneishi Timor Shipbuilding, Unipesoal,Lda ne’ebé halo desizaun hodi halo investimentu boot. Ne’e nivél mundiál,” Ramos-Horta hateten iha Otél Timor.

Ramos-Horta husu atu projetu ida-ne’e Governu tenke fó insentivu hotu-hotu ba kompañia sira hanesan eleminasaun impostu ba tinan-30 ka tinan-50 liután, tanba importante liubá Timor fabrika no estáleiru ne’e  kriá empregu no transforma koñesimentu ba Timoroan sira.

Xefe Estadu husu ba traballadór sira aproveita oportunidade di’ak no husu joven sira atu hatudu sira nia badinas no disiplina iha sira nian servisu.

Prezidente kompañia Tsuneishi Timor Shipbuilding, KUBO Takahiro, hateten nia parte  agradese ba fakuldade Enjiñaria husi Universidade Nasionál Timor Lorosa’e  (UNTL) tanba suporta ona estudante sira husi ejgiñaria UNTL bele servisu hamutuk ho  kompañia Tsuneishi Timor ShipBuilding  hahú iha tinan 2024.

“Ohin loron, ami hamutuk ho funsionáriu foun na’in-19  no agora hamutuk na’in-58  ona, ne’e la’ós de’it aumenta numéru funsionáriu maibé ami fiar katak ida-ne’e hanesan pasu ida importante atu bele suporta investimentu iha rai ida-ne’e nian,” KUBO Takahiro hateten iha nia diskursu.

KUBO Takahiro esplika Tsuneishi la’ós de’it hanesan kompaña ida, maibé hanesan mós fatin ida atu dezenvolve ema iha Timor-Leste. Tamba objetivu husi  kompaña  Tsuneishi Timor ShipBuilding, Unipesoal,L.da,  mak atu hamutuk ho povu Timor-Leste sira konstrui Shipbuilding konstrusaun ne’ebé importante tebes ba Timor-Leste.

Flaviana Maria Leon Moreira hanesan traballadora Timoroan iha  Tsuneishi Timor Shipbuilding espresa nia kontente tanba hola parte iha empreza ne’ebé sei tulun dezenvolvimentu iha Timor-Leste no sei fó mós retornu ekonomiku ba família.

“Ami hakarak lori Timor nia naran ba mundu ho ami nia servisu, no ami iha mehi ida mak hakarak ró ne’ebé ami sei konstrui husi  kompaña Tsuneishi  halo ró hodi bele halo operasaun iha tasi Timor-Leste nian,” Flaviana Maria Leon Moreira hateten.

Jornalista: Zita Menezes/Editór: Vito Salvadór