Tribunál Kondena Sidadaun Bangladexe ho Pena Multa

Arguidu aprezenta aan iha Tribunál Judisiál Primeira Instánsia Díli, Sesta 2 Outubru 2026.

Díli, 08 Outubru 2026 (RAFA)- Tribunál Judisiál Primeira Instánsis Dili, liu husi Juíza Maria da Silva Pinto, Kinta-ne’e, halo leitura bá akordaun no kodena sidadaun Bangladexe ho pena multa  US$270.00 tanba alegadamente halo espekulasaun ba folin sasán sesta bázika, liu-liu produtu mina bimoli ho sasán bázika seluk tan iha nia loza rasik iha área Becora.

Bazeia bá desizaun Tribunál hodi kondena arguidu Bangladexe ne’e ho pena multa durante loron-90, ho taxa diária US$3.00. Ho kalkulasaun ne’e, montante multa tomak hamutuk US$270.00 no  Tribunal mós valida katak, se multa ne’e la selu, Tribunál sei  halo alterasaun pena prizaun durante loron-60.

Ministériu Públiku ne’ebé reprezenta husi Prokuradór Bartolomeo de Jesus husu Tribunál atu aplika médidia suspensaun fulan-tolu, no suspende bá tinan ida, tanba konsidera iha indísiu. Maibé Ministériu Públiku husu Tribunál atu tetu tuir konviksaun.

Defensór Públiku Francisco Caetano Martins, ne’ebé fó asisténsia legal ba arguidu husu tribunál, atu absove arguidu husi krime espekulasaun presu, tanba arguidu koopera ho autoridade AIFAESA sira hodi taka nia loza.

Tuir akuzasaun MP nian, katak iha loron 09 fulan-Fevereiru tinan 2023, funsionáriu Autoridade Inspesaun no Fiskalizasaun Atividade Ekonómika no Alimentar (AIFAESA) hala’o kontrolu bá folin sasán sesta bázika iha área Becora.

Durante inspesaun iha loza arguidu nian ne’e, funsionáriu AIFAESA deskobre katak loza ne’e fa’an produtu mina ho folin ne’ebé liu porsentu 10 husi limite ne’ebé Governu estabelese. Tanba ne’e Ministériu Públiku, konsidera arguidu bangladexe ne’e aproveita situasaun ne’e atu halo espekulasaun bá folin produtu mina ho objetivu hetan lukru boot bá aan rasik.

Arguidu halo asaun ne’e ho konsiénsia no delibera, maske arguidu hatene katak hahalok refere bele viola dispozisaun legál kona-bá kontrolu folin sasán sesta bázika.

Ministériu Públiku konsidera arguidu nu’udar autór material, ho forma konsumada, bá krime asambarkamentu no espekulasaun folin, tuir dispozisaun sira iha lei númeru 4/2011, loron 1 Juñu, kona-bá krime asambarkamentu no espekulasaun.

Jornalista: Marcelino Tomae