PNTL Díli Sei Aprezenta Kazu Xinés Ida Ne´ebé Mate iha Tasi-Tolu Ba Ministériu Públiku

Komandante PNTL Munisípiu Díli, Komisáriu Asistente Polísia Orlando Gomes.

Díli, 19 Outubru 2026 (RAFA)- Polísia Nasionál Timor-Leste (PNTL) Munisípiu Díli, liu husi Polísia Eskuadra Dom Aleixo, sei aprezenta kazu sidadaun estranjeiru ida ho nasionalidade Xina ne’ebé mate iha área tasi ibun Tasi-Tolu ba Ministériu Públiku (MP) hodi kontinua prosesu tuir lei.

“Ita nia Polísia Eskuadra Dom Aleixo bolu ona ninia feen atu rekolla informasaun. Depois, ita sei bolu tan testemuña balun atu rona sira-nia informasaun. Kazu ne’e sei aprezenta ba Ministériu Públiku, no ita hein rezultadu autópsia,” Komandante PNTL Munisípiu Díli, Komisáriu Asistente Polísia Orlando Gomes ba jornalista sira iha Polísia Eskuadra Dom Aleixo, Díli, Segunda-ne´e.

Komisáriu Asistente Polísia ne’e hatete, investigasaun kona-bá kronolojia akontesimentu ne’e sei kontinua, liu husi rekolla informasaun husi família no testemuña sira, atu ajuda autoridade kompetente klarifika faktu sira kona-ba kazu ne’e.

Orlando Gomes subliña  kona-bá kauza mate vítima nian, polísia sei hein rezultadu autópsia husi Ospitál Nasionál Guido Valadares (HNGV) atu hetan informasaun médika ne’ebé bele ajuda determina kauza mate.

Mate-isin vítima sei kontinua rai hela iha Mortuáriu HNGV atu hein prosesu autópsia. Depois prosesu ne’e remata, mate-isin sei entrega ba família atu organiza serimónia funerál tuir kultura no tradisaun família nian.

Jornalista: João Carlos / Juvinal Cabral