Tribunál Julga Bangladexe Ida Ne’ebé Sai Arguidu Ba Manipula Presu Sasán Sesta Bázika

Arguidu aprezenta aan iha Tribunál Judisiál Primeira Instánsia Díli, Sesta 2 Outubru 2026.

Díli, 02 Outubru 2026 (RAFA)– Tribunál Judisiál Primeira Instánsia Díli (TJPID), Sesta-ne’e, halo julgamentu ba bangladexe ida ne’ebé alegadamente halo espekulasaun ba folin sasán sesta bázika, liu-liu produtu mina bimoli ho sasán bázika seluk tan iha nia loza rasik iha área  Becora.

Iha julgamentu ne’e, Minitériu Públiku (MP) akuza arguidu nu’udar na’in ba loza  komete krime asambarkamentu no espekulasaun folin sasán sesta bázika, liu-liu produtu mina bimoli ho sasán bázika seluk tan.

Tuir  akuzasaun MP nian, katak  iha loron 09 fulan-Fevereiru tinan 2023, funsionáriu Autoridade Inspesaun no Fiskalizasaun Atividade Ekonómika no Alimentar (AIFAESA) hala’o kontrolu bá folin sasán sesta bázika iha área Becora.

Durante inspesaun iha loza arguidu nian ne’e, funsionáriu AIFAESA  deskobre katak loza ne’e fa’an produtu mina ho folin ne’ebé liu porsentu 10 husi limite ne’ebé Governu estabelese. Tanba ne’e Ministériu Públiku, konsidera arguido bangladexe ne’e aproveita situasaun ne’e atu halo espekulasaun bá folin produtu mina ho objetivu hetan lukru boot bá aan rasik.

Arguidu  halo asaun ne’e ho konsiénsia no delibera, maske arguidu hatene katak hahalok refere bele viola dispozisaun legál kona-bá kontrolu folin sasán sesta bázika.

Ho  alegasaun hirak-ne’e,  Ministériu Públiku konsidera  arguidu nu’udar autór material, ho forma konsumada, bá krime asambarkamentu no espekulasaun folin, tuir dispozisaun sira iha  lei númeru 4/2011, loron 1 Juñu, kona-bá krime asambarkamentu no espekulasaun.

Hafoin rona tiha alegasaun arguidu ne’e deklara bá Tribunál katak  faktu ne’ebé Ministériu Públiku konsta iha akuzasaun loos hotu-hotu.

Arguidu konfensa katak,  iha momentu ne’ebá bainhira ekipa  husi AIFAESA halo Inspesaun,  nia sai hodi bá  hola sasán loza nian, bainhira fila maka haré fita  ne’ebé AIFAESA dada taka provizoríu.

Nia mós deklara katak, tanba nia foin loke loza ne’e  fulan-tolu,  nune’e seidauk komprende regra ka presu ne’ebé Governu Timor-Leste estabelese, no mós seidauk hetan sensibilizasaun rumu  husi parte Governu kona-bá  sasán folin iha merkadu Timor-Leste

Arguidu mós deklara katak durante ne’e iha koñesimentu de’it kona-bá  AIFAESA nia servisu hodi kontrola bá sasán nia prazu no mós ijene.

Iha bibian ne’e mós sasin husi AIFAESA    haktuir bá tribunál katak iha loron 09 fulan-Fevereiru tinan 2023,  halo Inspesaun  maka sira deteta  loza refere fa’an sasán bázika la tuir presu nasionál nian, tanba ne’e AIFAESA bolu arguidu hodi hatama nota kona-bá sasán  bázika  nia folin refere.

Rona tiha arguidu ho sasin, Tribunál prosede bá alegasaun, tanba ne’e iha alegasaun, Ministériu Públiku ne’ebé reprezenta husi Prokuradór Bartolomeo de Jesus husu  Tribunál atu aplika médidia suspensaun fulan-tolu, no suspende  bá tinan ida, tanba konsidera iha indísiu. Maibé  Ministériu Públiku husu Tribunál atu tetu tuir  komviksaun.

Defensór Públiku Francisco Caetano Martins,  ne’ebé fasilita asisténsia legal ba arguidu husu tribunál,  atu absove arguidu husi krime esplikasaun presu, tanba  arguidu koopera ho autoridade AIFAESA sira hodi halo taka  nia loza.

Rona tiha alegasaun Ministériu Públiku  no defeza, Juíza  Maria da Silva  deside adiak ba Kuarta, 07 fulan-ne’e hodi lei halo letura bá despaisu.

Jornalista: Marcelino Tomae