Transporte Sira Ne’ebé Okupa Espasu Públiku Selu Multa US$45.00

Motór sira ne'ebé Polísia halo aprrensaun tanba estasiona iha espasu públiku.

Díli  27 Jullu 2026 (RAFA.TL)– Ekipa konjunta ne’ebé lidera husi Sekretáriu Estadu Toponímia no Organizasaun Urbana (SEATOU),  Germano Santa Brites, hahú halo operasaun iha Díli laran hodi tau-matan ba transporte sira ne’ebé okupa espasu públiku.

Xefe Tranzitu Polísia Nasiál Munisípiu Díli, Superintendente Assistente Polísia Delfin da Silva, Segunda-ne’e, hateten  durante ekipa konjunta halo operasaun tama sai baírru sira iha Kapital Díli, identifika transporte balun okupa espasu públiku. Nune’e, ekipa halo apreensaun  hasai karreta ho motór sira-nia xapa matrikula hodi lori ba asegura iha  PNTL Munisípiu Díli ho Diresaun Nasionál Transporte no Terrestre (DNTT) atu  na’in sira ba kumpri prosesu administrativu  selu multa ho montante US$45.00 kada transporte.

“Transporte sira ne’ebé nia sapa matrikula hasai mak na’in la mai aprezenta aan ka na’in laiha entaun ita fasilita transporte hodi tula de’it depois mak na’in buka tuir hodi selu,” Xefe Polísia Tranzitu Munisípiu Díli ne’e hateten.

Tuir nia, medida ne’ebé ekipa konjunta aplika hodi selu koima ho kontante $45.00 la’ós kastigu, maibé hanesan sansaun administrativu. Maibé, bainhira na’in ba aprezenta aan tenke lori trnasporte nia dokumentu komprovativu sira.

“Bainhira dokumentu sira ne’e mai mak balun liu tempu ona ka dokumentu mate, ne’e sei aplika tan sansaun koima tuir regulamentu ne’ebé aplika antes ona trnasporte hotu-hotu,”  Superintendente Assistente Polísia Delfin da Silva hateten.

Durante operasaun ne’e,  ekipa konjunta kompostu husi Polísia Tranzitu,  SEATOU ho Auytoridade Munisípiu Díli halo mós edukasaun ba motorista  sira kona-bá importánsia respeita sinalizasaun tráfiku, uza fatin estasionamentu ne’ebé apropriadu no evita estasiona transporte iha fatin ne’ebé bele impede movimentu veíkulu no ema sira.

Xefe Tranzitu  Polísia Munisípiu Díli ne’’e apela ba ema hotu-hotu atu kolabora ho autoridade sira, kumpre Lei Tranzitu Rodoviáriu  no respeita direitu utilizadór estrada seluk nian.

Jornalista: João Carlos