Noticias

Trade Expo 2026 Hasa’e Koñesimentu Estudante iha Área Ekonomia

todayNovember 16, 2026 35

Background
share close

Díli, 16 Novembru 2026 (RAFA) – Estudante sira husi nivel universitáriu konsidera eventu Dili International Trade Expo 2026 ajuda hasa’e koñesimentu iha área ekonomia no promove sira-nia kreatividade ba públiku.

Estudante husi Institute of Business (IOB), Unista do Santos, iha resintu Sentru Konvensaun Díli, Segunda ne’e, hatete aprezentasaun iha Trade Expo ba daruak ne’e di’ak tebes atu hatudu produtu lokál ba mundu internasionál.

Tuir nia, eventu ne’e fó benefísiu boot ba parte akadémika no ba nasaun hodi hametin relasaun iha área teknolojia.

“Ami-nia sentimentu ba expo ne’e di’ak tebes, tanba bele promove ami-nia instituisaun. Bainhira ema husi parte seluk hakarak hatene buat ruma, sira bele mai husu diretamente no transparente ho ami estudante sira,” dehan Unista do Santos.

Nia haktuir katak durante eventu ne’e, estudante husi Fakuldade Teknolojia Informasaun no Komunikasaun (ICT) no Enjeñaria husi IOB aprezenta sira-nia kriatividade rasik, hanesan website no aplikasaun dijitál oioin.

Iha fatin hanesan, estudante husi Fakuldade Ekonomia, Departamentu Jestaun, Universidade da Paz (UNPAZ), Olga Martins Baptista Freitas Guterres, sente kontente tanba Governu kria ona espasu ne’e atu promove estudante sira-nia produtividade no inovasaun.

“Produtu sira-ne’e ami rasik mak prodús liuhusi Timor Sea Glass Art. Ami ba hili vidru iha tasi-ibun, lori mai uma hodi hamoos didi’ak, hafoin halo sai obra arte ne’ebé kombina ho tais,” tenik Olga Martins Baptista.

Nia rekomenda ba Governu atu hadia sistema organizasaun iha ambiente expo nian, tanba sira-nia pavillaun seidauk hetan vizita husi membru Governu no konvidadu importante sira.

Jornalista: Remigia Locatelli

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!