Traballadór Timoroan iha Programa PALM Iha Northern Territory Hetan Respeitu no Tratamentu Di’ak

Ministra Xefe Territóriu Norte Austrália, Lia Finocchiaro.

Díli, 08 Setembru 2026 (RAFA)- Ministra Xefe Territóriu Norte Austrália, Lia Finocchiaro garante katak traballadór Timoroan sira ne’ebé serbisu liuhosi program Pacific Australia Labour Mobility (PALM) iha Northern Territory hetan respeitu, simu saláriu, no hetan tratamentu di’ak.

“Nu’udar Ministru Prezidente Northern Territory, ha’u bele dehan ho konfiansa katak traballadór Timoroan sira ne’ebé servisu liuhosi PALM Scheme iha Northern Territory hetan respeitu, simu sira nia saláriu, no ami simu sira ho di’ak. Ha’u hakarak enfatiza katak, maske iha problema balun iha parte seluk husi Austrália no asuntu hirak-ne’e tenke responde husi governu sira ne’ebá iha Northern Territory, hanesan ha’u temi ona, ami iha komunidade Timoroan ida forte tebes,” Ministra Lia Finocchiaro  haktuir ba jornalista sira iha Palásiu Prezidensiál, Tersa-ne’e.

Lia Finocchiaro afirma, sira mós iha relasaun ida forte ho Timor-Leste. Tanba ne’e, sira foka atu kontinua kria ambiente ida ne’ebé manas no simu ema hotu ho di’ak, atu sira sente katak Northern Territory mak hanesan uma daruak ba sira. Ida-ne’e mak buat ne’ebé sira orgullu ba.

Lia Finocchiaro reforsa, laiha insidente ruma pelo kontráriu, traballadór Timoroan sira simu ho liman nakloke iha Northern Territory, no ida-ne’e mak sira sei kontinua halo.

 Komprimisu hametin no apoiu Timor-Leste iha área importante haat

Ministra Xefe Territóriu Norte Austrália, Lia Finocchiaro hatete Timor-Leste no Northern Territory iha relasaun espesiál tamba ne’e iha kumprimisu  atu hametin kooperasaun iha área haat importante hanesan hametin forsa traballu, saúde, edukasaun no ekonomia.

Lia Finocchiaro esplika, Northern Territory no Timor-Leste iha amizade no relasaun espesiál tebes. Nu’udar parte husi misaun ne’ebé sei hala’o durante loron hirak tuir mai, importante tebes atu kontinua hala’o Acordu Parseria Estratéjika ne’ebé Northern Territory iha ho Timor-Leste.

“Puntu importante ida husi enkontru sira ha’u halo ohin mak kontinua dezenvolve forsa traballu no kapasidade iha Timor-Leste. Maibé, ita mós hakarak aumenta oportunidade ba traballadór Timoroan sira atu bele servisu iha Northern Territory,” hatete Ministra Lia Finocchiaro.

Lia Finocchiaro haktuir iha komunidade Timoroan ida boot tebes iha Northern Territory. Tanba ne’e, aumenta mobilidade traballu ba Timoroan sira atu servisu iha Northern Territory mak buat ida úniku no espesiál tebes, no sai parte importante husi relasaun ne’ebé ita iha no bele kontinua dezenvolve.

Ministra ne’e orgullu tebes ho parseria ne’ebé Charles Darwin University iha ho Timor-Leste. Ami foin simu doutór no médiku espesialista sira husi Timor-Leste ne’ebé iha esperiénsia boot atu ba Northern Territory no halo formasaun prátika iha sira nia ospitál.

Maibé mós iha ona oportunidade atu fahe koñesimentu no dezenvolve kapasidade iha área jestaun krokodilu iha Timor-Leste. Tanba ne’e, kontinua servisu hamutuk iha projetu oi-oin, no hakarak atu aumenta tan kooperasaun ne’e iha futuru.

Nia hateten ho enkontru ida di’ak tebes ho Prezidente Repúblika, no sira ko’alia kona-ba asuntu oi-oin. La tama ba detallu kona-ba saida mak sira ko’alia iha enkontru, maibé bele dehan, iha área kooperasaun barak tebes ne’ebé Timor-Leste no Northern Territory bele servisu hamutuk.

“Ami orgullu tebes ho relasaun ne’ebé ita iha ona. Maski ida-ne’e mak ha’u nia vizita dahuluk ba Timor-Leste, ha’u nia kolega, Ministru ba Komérsiu, Negósiu no Relasaun ho Ázia, mai ona Timor-Leste dala barak no sei mai tan iha semana rua tuir mai. Ha’u nia Ministru Edukasaun mós mai ona Timor-Leste. Tanba ne’e, ita iha amizade ida ne’ebé kle’an no kleur ona, no ha’u fiar katak relasaun ne’e sei kontinua sai forte liután iha futuru,” Ministra Lia Finocchiaro konklui.

Jornalista: Cristina Ximenes