Noticias

TLPDP Oferese Motór Unidade 80 Ba PNTL Hodi Hametin Kapasidade Operasionál no Patrullamentu iha Terrenu

todayNovember 18, 2026 17

Background
share close

Díli, 18 Novembru 2026 (RAFA)— Timor-Leste Police Development Program (TLPDP), Tersa-ne’e, oferse motór unidade 80 ba Polísia Nasionál Timor-Leste (PNTL)  hanesan faze dahuluk husi apoiu ne’ebé TLPDP sei kontinua iha faze tuirmai ho tan motór unidade 80 iha fulan-oin.

Komandante TLPDP, Komisáriu Darren Boyd Skinner, iha seremonia intrega motór unidade 80 ba Komandu Jerál PNTL hatete antes ne’e TLPDP halo revizaun ba programa kooperasaun ho PNTL no identifika área prioridade tolu atu reforsa kapasidade polísia, liuliu iha nivel suku no munisípiu, hadi’a komunikasaun liuhusi rede dijitál atu fasilita koordenasaun servisu, no fornese treinamentu ba ofisiál polísia sira iha munisípiu.

“Ida-ne’e hanesan revizaun ida ne’ebé ami TLPDP hala’o atu konkretiza liután programa servisu. Ami identifika área prioridade tolu, mak oinsá atu reforsa ofisiál polísia suku, atu hasa’e sira-nia atividade no bele besik liután ho komunidade, hodi fornese servisu ne’ebé efetivu. Aleinde ne’e, oinsá atu hadi’a komunikasaun hodi reforsa servisu liuhusi rede dijitál, no ikusmai oinsá atu fornese treinamentu ba ofisiál sira iha munisípiu,” hatete Komisáriu Darren Boyd Skinner.

Biban ne’e, Komandante-Jerál PNTL, Komisáriu Asistente Afonso dos Santos, agradese no apresia ba Governu no Povu Austrália, Polísia Federál Austrália ka AFP, liuliu ba Komisáriu Darren Boyd Skinner ho ekipa tomak, tanba apoiu ne’ebé fó ba instituisaun PNTL.

“Ha’u apela ba komandante no ofisiál hotu-hotu atu uza, jere no halo manutensaun ba ekipamentu hirak ne’e ho responsabilidade, hodi garante katak sira fó benefísiu máximu ba servisu no seguransa komunidade,” hatete Komisáriu Asistente Afonso dos Santos.

Entertantu, parseria ne’e sei kontinua hametin kapasidade institusionál PNTL, atu asegura seguransa nasionál no kumpre ho di’ak responsabilidade institusionál, inklui preparasaun ba Timor-Leste nia adezaun ASEAN iha tinan 2029.

Tuir Komandante-Jerál PNTL ne’e, motór hirak-ne’e sei distribui ba Komandu Munisipál sira atu fahe ba ofisiál polisiamentu komunitáriu iha nivel suku, hodi fasilita sira-nia movimentu no halo servisu hodi  fó atendimentu lalais ba komunidade iha terenu.

Jornalista: João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!