Ouvir RAFA Ritmo, Voz e Coração de Timor
Díli, 13 Novembru 2026 (RAFA)– Asesór prinsipál husi Ajensia Timor-Leste Police Development Program (TLPDP), José Turquel, konfirma katak TLPDP kontinua fó apoiu tékniku atu hametin kapasidade profisionál ba kadete PNTL sira, ho atensaun ba edukasaun direitu umanus, étika profisionál, responsabilidade no aplikasaun lei durante hala’o knaar nu’udar ajente seguransa.
“TLPDP kompromete atu kontinua suporta desizaun hotu-hotu ne’ebé PNTL no Governu halo, hodi kontinua hametin PNTL atu bele responde ba dezafiu sira iha tempu atuál, liuhusi formasaun,” hatete José Turquel, Sesta-ne’e.
Iha prosesu rekrutamentu ne’e, TLPDP kuaze envolve iha prosesu hotu, inklui iha juri, observasaun no mós teste médiku.
TLPDP fornese apoiu finanseiru hodi suporta teste médiku ne’e to’o remata atu asegura prosesu la hetan impedimentu, liuliu iha aspetu tékniku.
José Turquel esplika apoiu TLPDP la limita de’it ba prosesu rekrutamentu, maibé mós kontinua fó atensaun ba área seguransa, liuhusi apoiu ba formasaun no dezenvolvimentu kapasidade membru PNTL sira, atu bele responde ba krime oioin ne’ebé akontese iha Timor-Leste.
Nia subliña PNTL presiza membru ne’ebé iha koñesimentu, kapasidade téknika no abilidade profisionál atu enfrenta krime tradisionál no krime foun, inklui krime sibernétiku.
Asesór prinsipál TLPDP ne’e mós afirma ajénsia TLPDP mos estabelese ona laboratoriu forénsiku atu hametin kapasidade investigasaun krime, liuliu kazu sira ne’ebé relasiona ho atividade ilísitu scam call centre.
Nia hatutan dezenvolvimentu laboratoriu forénsiku ne’e importante atu ajuda autoridade kompetente sira iha prosesu deteksaun no rekolla evidénsia sientífika, hodi suporta investigasaun krime sibernétiku no facilita prosesu justisa.
Nia konsidera katak investigasaun kazu scam call centre presiza kapasidade forénsiku no téknika espesializada, tanba krime sira-ne’e dala barak envolve teknolojia, rede komunikasaun no movimentu informasaun dijitál.
Nia mós reafirma kompromisu atu kontinua kolabora ho PNTL no Governu Timor-Leste hodi hametin kapasidade institusionál, dezenvolve rekursu umanu no hasa’e kualidade servisu polisiamentu atu garante seguransa ba povu Timor-Leste.
Jornalista: João Carlos
Written by: RafaFM
TLPDP Kontinua Fó Apoiu Tékniku Ba Rekrutamentu no Formasaun Kadete Foun PNTL
todayNovember 20, 2026 10 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt