Titiek Soeharto Agradese Ramos-Horta ho Premiadu Nobel no Premiu Turin Sira Vizita TWNC

PR José Ramos-Horta hamutuk ho Premiadu Nobel ba Paz no Premiu Turin sira vizita Tambling Wildlife Nature Conservation iha Illa Sumatra-Indonézia, KInta 27 Agostu 2026.

Sumatra, 28 Agostu 2026 (RAFA)- Membru Politikú Partidu Gerindra no Prezidente  Komisaun IV Dewan Perwakilan Rakyat Republik Indonesia (DPR-RI), Siti Hediati Hariyadi  ne’ebé koñesidu liu ho naran Titiek Soeharto, hato’o agradese ba Prezidente Repúblika José Ramos-Horta no  laureadu Nobel ba Paz no Premiu Turin sira ne’ebé vizita ona Tambling Wildlife Nature Conservation.

“Ita-boot sira-nia prezensa iha Tambling Wildlife Nature Conservation fó signifikadu ba buat barak. Ita-boot reprezenta koñesimentu, deskoberta, inovasaun, no lideransa husi mundu tomak. Ami hein katak Tambling sei liga ita-boot ho ita-boot nia instituisaun sira, universidade sira, rede peskiza sira, parseiru teknolójia sira, no komunikasaun globál sira,” Titiek Soeharto hateten.

Husi Illa Sumatra-Indonézia, Jornalista RAFA, Elio da Costa dos Santos relata katak Titiek Soeharto, oan-feto hosi Prezidente Repúblika Indonézia ba daruak, Soeharto, haktuir katak kuazé tinan 30 ona, esforsu konservasaun no proteje Tambling Wildlife Nature  kontinua sai kompromisu husi  Parke Nasionál Bukit Batu Selatan no Arta Graha Peduli AGP ne’ebé jere husi Tommy Winata hodi kontinua haburas ba iha futuru no ba jerasaun foun sira.

TWNC  bele sai laboratóriu moris ida iha ne’ebé natureza hasoru siénsia, teknolojia, edukasaun, no ho esperansa, kooperasaun internasionál.

Titiek Soeharto, eis-espoza hosi atuál Prezidente Indonézia nian, Prabowo Subianto. hateten,  husi vizita Laureadu Nobel no Premi Turin sira bele  ajuda Tambling Wildlife Nature Conservation TWNC,  dezenvolve ideia foun sira, oinsá esplora  siénsia no teknolojia bele hametin konservasaun biodiversidade, protesaun klimátika, sustentabilidade, no dezenvolvimentu sustentável, proteje natureza no biodiversidade.

Tambling Wildlife Nature Conservation la’ós de’it  ekosistema postál sira, la’ós de’it patrimóniu naturál,  maibé TWNC nu’udár  esensiál ba sustentabilidade klimátika, seguransa ai-han, meius subsisténsia, no moris-di’ak jerasaun sira iha futuru.  No Husi Tambling sai ponte entre Indonézia no mundu, entre siénsia no natureza, entre konservasaun no inovasaun, no entre ambisaun globál no asaun lokál.

“Obrigadu tanba ita-boot iha ne’e, tanba loke ita-boot nia matenek no ita-boot nia kuriozidade, no tanba loke ita-boot nia an ba posibilidade sira ne’ebé laiha rohan. Ikus liu, ha’u hakarak hato’o ha’u-nia gratidaun no apresiasaun ba Prezidente  Repúblika Timor-Leste, José Ramos-Horta tanba mai vizita fali ita ba dala rua no lori ema importante barak iha mundu, Laureadu Nobel ba  Paz sira ho Premiu Turin sira, ne’e duni onra ida ba ita,” Titiek Soeharto agradee.

Vizita Prezidente Repúblika, José Ramos-Horta, Premiadu Nobel   ba Paz no Premiu Turin sira iha Kinta,  27 Agostu 2026, ba  Tambling Wildlife Nature Conservation iha Illa Sumatra-Indonézia ne’e simu direita husi Titiek Soeharto, emprezáriu na’in ba Fundasaun Artha Graha Peduli (AGP) Tomy Winata no ekipa Tambling Wildlife Nature Conservation TWNC.

Vizita Prezidente Repúblika José Ramos-Horta, Premiadu Nobel  no Premiu Turin sira  ba  Tambling Wildlife Nature Conservation TWNC iha Illa Sumatra ne’e kada figura sira husik hela sira nia asinatura iha binkai hodi sai memórial ba Tambling Wildlife Nature Conservation TWNC iha futuru.

Iha loron tuir mai, 28 Agostu-ne’e, Prezidente Repúblika José Ramos-Horta, Premiadu Nobel ba Paz   no Premiu Turin sira akompaña husi   Titiek Soeharto viajen fali ho  aviaun elikopteru husi Tambling Wildlife Nature Conservation ba Jakarta hodi halo enkontru ho  Prezidente Repúblika Indonézia ba da-lima, Megawati Sukarnoputri, no Prezidente Repúblika Indonézia Prabowo Subianto.  Remata