Ouvir RAFA Ritmo, Voz e Coração de Timor
Timor Telecom selebra nia aniversáriu ba dala-24 iha semana nia rohan liubá ho konsertu ida ne’ebé halibur ema besik 10.000 iha sentru Díli. Imajen/Espesiál
Díli, 21 Outubru 2026 (RAFA) – Timor Telecom (TT), operadór telekomunikasaun boot liu iha Timor-Leste, selebra nia aniversáriu ba dala-24 iha semana nia rohan liubá ho konsertu ida ne’ebé halibur ema besik 10.000 iha sentru Díli.
Selebrasaun ne’e hala’o durante loron rua, hahú iha 17 Outubru, loron aniversáriu Timor Telecom, ho misa agradesimentu iha Igreja Motael.
Iha loron hanesan, empreza ne’e organiza Festival TT24 iha Largo Lecidere, Díli. Iha loron tuirmai, hala’o almosu konfraternizasaun ho funsionáriu sira iha Hotel Timor, ne’ebé mós partisipa husi konvidadu oioin, inklui membru Governu.
Festival TT24 entrada gratuita no transmite diretamente durante oras neen, la ho interupsaun, liuhusi Facebook, TikTok no YouTube. Tuir informasaun husi empresa, transmisiaun ne’e hetan vizualizasaun liu 40.000. Área eventu nian hetan kobertura rede telemóvel no Wi-Fi husi Timor Telecom, no mós iha fatin fa’an hahán ne’ebé fó oportunidade ba vendedór lokál sira.
Artista sira ne’ebé partisipa iha festival inklui Criimson, Rai Ketan, Família Akustic, El Chapo, Klamar no Alcatraz. Atu taka programa iha kalan ne’e, DJ Lila no DJ Elvis anima espetadór sira. Criimson, ne’ebé halo atuasaun dala rua hamutuk ho banda kompleta, aprezenta ofisialmente nu’udar Embaixadór Marka Timor Telecom.
Durante eventu, logótipu Timor Telecom projeta iha edifísiu ida ne’ebé aas liu iha sidade Díli. Públiku mós partisipa iha jogu pergunta no resposta no simu prezente husi empreza.
Almosu iha Hotel Timor sai momentu atu hametin relasaun no fó apresiasaun ba funsionáriu sira ne’ebé kontribui hodi dezenvolve rede no servisu Timor Telecom iha territóriu tomak. Entre partisipante sira mak Ministru Justisa, Sérgio Hornai; Vise-Ministra Finansas, Regina de Jesus; Prezidente Konsellu Administrasaun Timor Telecom, Nilton Gusmão; Diretór Ezekutivu (CEO), Vitor Cardoso; no reprezentante acionista, Júlio Alfaro.
Iha enkontru ne’e, empresa destaka nia istória, kompromisu ekipa sira atu fó servisu di’ak ba kliente no dezafiu sira ne’ebé sei hasoru iha tinan sira oin mai.
Prezidente Konsellu Administrasaun Timor Telecom, Nilton Gusmão, afirma katak empreza hakarak kontinua akompaña povu Timor-Leste iha prosesu dezenvolvimentu no konstrusaun futuru nasaun nian. Nia mós subliña katak Timor Telecom pertense ba funsionáriu hotu no sidadaun timoroan sira.
Selebrasaun aniversáriu ba dala 24 ne’e la’ós de’it atu komemora tinan servisu empreza nian, maibé mós atu apresia kontribuisaun funsionáriu, hametin relasaun ho kliente no komunidade, no reafirma kompromisu Timor Telecom atu kontinua dezenvolve servisu telekomunikasaun iha Timor-Leste.
Ekipa RAFA
Written by: RafaFM
Timor Telecom Selebra Aniversáriu ba Dala-24 ho Konsertu Ne’ebé Halibur Ema 10.000 iha Díli
todayNovember 20, 2026 12 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt