Timor-Leste Uma Nain Reuniaun Konsellu Ministru CPLP Ba Dala-XXXI

CPLP

Díli, 11 Agostu 2026 (RAFA) —Timor-Leste sai hanesan uma na’in ba reuniaun Konsellu Ministru Komunidade Nasaun sira Ko’alia Lian Portugés  (CPLP, sigla portugés) ba dala-XXXI, hahú husi loron 12 to’o  loron 19 fulan-Agostu ne’e.

Tuir oráriu ne’ebe fó sai husi Koordenadór Jerál Komisaun Rotativa CPLP, Joaquim Fernandes katak programa reuniaun Konsellu Ministru CPLP ba dala-XXXI ne’e konta ho partisipasaun pontu fokál sira, reprezentante setór sira no delegasaun husi Estadu membru CPLP.

Koordenadór Jerál CPLP ne’e haktuir, molok reuniaun Konsellu Ministru, sei realiza atividade no programa oioin ne’ebé sei diskute kona-bá ajenda estratéjika CPLP ba tinan sira tuir mai.

“Iha períodu 2014-2016, ita avansa ona dokumentu estratéjiku ne’e atu bele komesa implementa iha 2027, iha tempu Timor-Leste sai prezidénsia CPLP. Tanba, iha 2014-2016, pela primeira vez, ita iha tema importante ida, mak CPLP no globalizasaun,”  Joaquim Fernandes infroma, Tersa-ne’e.

Nia hatutan  maski Timor-Leste  dala barak konsidera nu’udar nasaun ho área rural barak, país ne’e kontinua hatudu vizaun, seriedade, dedikasaun no responsabilidade iha hala’o nia kna’ar iha CPLP.

Programa sira ne’ebé sei hala’o durante semana reuniaun CPLP iha Timor-Leste mak hanesan; iha loron 13–14 Agostu, Semináriu Pontu Fokál Setór Nasionál, ba dala-II, iha Timor-Leste; iha loron 15–16 Agostu, Reuniaun Pontu Fokál ba Kooperasaun, ba dala-52, entre nasaun  membru CPLP sira; iha loron 17 Agostu, Reuniaun Grupu Traballu Komité Konsertasaun Permanente (CPP); iha loron 18 Agostu: Reuniaun Ordinária Komité Konsertasaun Permanente (CPP), ba dala-294; iha loron tuir mai 19 Agostu, Reuniaun Ordinária Konsellu Ministrus CPLP, ba dala-XXXI.

Iha reuniaun sira-ne’e, partisipante sira sei diskute tema prinsipál balu, mak hanesan, ajenda Estratéjika CPLP 2027–2033; Kooperasaun Ekonómika no Empresariál; Protesaun Sosiál no Mobilidade; Estadu Direitu Demokrátiku; no Situasaun iha Repúblika Guiné-Bissau.

Delegasaun husi país membru CPLP ne’ebé sei partisipa iha reuniaun sira-ne’e inklui reprezentante sira husi Angola, Brazil, Cabo Verde, Guiné Equatorial, Moçambique, Portugal no São Tomé  Príncipe.

Delegasaun sira-ne’e sei reprezenta ministériu no instituisaun responsavel ba relasaun exteriór, negósiu estranjeiru, kooperasaun internasionál, defeza, justisa no direitus umanus, tuir área kompeténsia ida-idak.

Iha reuniaun ne’e sei partisipa mós husi Sekretária Ezekutiva CPLP, Embaixadora Maria de Fátima Jardim.

Jornalista: Remigia Locatelli