Timor-Leste Tenke Prezerva Legadu Demokrátiku Ne’ebé Saudozu Lú-Olo Husik Hela

Família sira ba fó onra ikus ba maktoban Francisco Guterres Lú-Olo iha nia rezidénsia iha Farol, Díli.

Díli, 23 Juñu 2026 (RAFA.TL)- Prezidente Parlamentu Nasionál (PPN), Maria Fernanda Lay, konsidera saudozu eis-Prezidente Repúblika, Francisco Guterres ‘Lú-Olo’, la’ós de’it riku-soin ida ba família, maibé mós ba nasaun Timor-Leste  tanba ne’e saudozu nia mate hanesan lakon boot ida ba nasaun.

PPN Maria Fernanda Lay iha vizita ba saudozu eis-Prezidente Parlamentu Nasionál Francisco Guterres ‘Lú-Olo’ nia rezidénsia iha Farol, tersa (23/06/2026), ho emosaun no ho matan-been, hatudu solidariedade ba família enlutada no rekoñese Lú-Olo nia papél nu’udar figura sentrál iha família no iha vida polítika nasionál.

“Ninia patrida hanesan lakon ida ba nasaun, ba partidu no liuliu ba nia família. Nia hanesan figura fundamental ida ne’ebé tau-matan ba nia oan sira. Ha’u preokupa ho nia família, maibé ha’u fiar katak nia espoza sei iha forsa hodi kontinua tau-matan ba labarik sira no ha’u iha serteza katak Estadu mós sei apoia sira,” Maria Fernanda Lay hateten.

Prezidente Parlamentu destaka mós legadu polítiku no institusionál ne’ebé saudozu husik hela, hodi hanoin hikas ninia lideransa iha Parlamentu Nasionál durante momentu sira ne’ebé partikularmente difisil iha istória nasaun nian.

PPN ne’e konsidera ezemplu ne’ebé eis-Prezidente Parlamentu Nasionál no Preizdente Asembleia Konstituente ne’e husilk hela tenke sai hanesan inspirasaun ba jerasaun siara liu-liu ba deputadu atuál no futuru, liuliu iha ezersísiu funsaun lejizlativa no iha promosaun kultura respeitu ba malu.

“Ha’u fiar katak matebian Prezidente sei haksolok hodi haré ami serbisu ho di’ak no prezerva demokrásia, ne’ebé sempre sai hanesan nia preokupasaun boot ida ba povu timoroan. Nia hanesan riku-soin boot ida ba nasaun no memória pozitivu ne’ebé nia husik hela sei hela nafatin ba futuru nasaun nian,”  PPN Fernanda Lay tenik.

Maria Fernanda Lay subliña, hanesan deputadu tenke konsidera nafatin legadu sira saudozu nian iha prosesu lejizlasaun, liu-liu atitude, ida-ne’e fo ezemplu ida ke di’ak tebes iha momentu sira Timor-Leste nia luta ba dezenvolvimentu nasionál.

Jornalista: Remigia Locatelli/Editór: Vito Salvadór