Timor-Leste Sei iha Ki’ak Barak Tanba Laiha Unidade Husi Lidér Sira

Sekretáriu Estadu Jerál no Prezidente Interinu Partidu FRETILIN, Marí Bin Amude Alkatiri.

Díli, 11 Setembru 2026 (RAFA) – Sekretáriu Estadu Jerál no Prezidente Interinu Partidu Frente Revolusionariu Timor-Leste Indepedente (FRETILIN) Marí Bin Amude Alkatiri, hateten iha selebrasaun tinan 52 ezisténsia FRETILIN rekoñese Timor-Leste sei iha ki’ak barak tanba laiha unidade husi lidér sira.

Sekretáriu Jerál Partidu FRETILIN, Marí Alkatiri liuhosi konferénsia imprensa iha Faról, Sesta-ne´e, hatete ohin loron marka partidu FRETILIN,  uluk fundador sira deside atu organiza aan para  responde ba povu nia ansidade, povu nia hakarak atu koré aan husi dezafiu no dominasaun husi li’ur.

Prezidente FRETILIN interinu ne’e haktuir, nune’e mak iha loron  11 fulan-Setembru 1974 moris  Frente Revolusionariu Timor-Leste Indepedente (FRETILIN), frente ne’e ninian karatér la’ós partidu asosiasaun nia karatér hanesan organizasaun ne’ebé bele halibur ema hotu ne’ebé hakarak indepedénsia tanba ne’e mak frente ne’e moris.

“Ohin, tinan 52 liu ona, sé mak ukun rasik rekoñese katak ki’ak sei barak, rekoñese ki’ak mais dalabarak la esplika tanba saida ki’ak iha, primeiru tanba laiha unidade. Ita nasionalista, ita patriota tomak bele ida-idak ho nia organizasaun no partidu, maibé iha kauza ida-ne’e tenke iha unidade ne’e mak FRETILIN nia desizaun iha politiká agora,” Sekretariu Jeráal FRETILIN Marí Alkatiri hateten.

Nia hatután maske Timor-Leste indepedénsia tiha ona ,maibé joven Timoroan barak mak sai imigrante ba iha nasaun seluk hodi buka moris tanba Governu laiha kapasidade atu halo Timor-Leste sai jardin ba ema hotu.

“Ha’u  ko’alia ne’e  nu’udár Sekretáriu Jerál partidu  FRETILIN, nu’udár fundadór, nu’udár mós Prezidente Interinu partidu FRETILIN nian.  Loron ohin, tinan  52 FRETILIN, ha’u hakarak reafirma fali posizaun uluk nu’udár fundadór hakarak Timor-Leste sai jardin ida ba Timoroan hotu,” nia tenik.

Taxa Pobreza atinze 71,7% Tanba  OJE La Tuun Ba Iha Bazé

Sekretáriu Estadu Jerál Partidu FRETILIN Marí Bim  Amude Alkatiri mós konsidera katak relatóriu Banku Mundiál ne’ebé indiká Timor-Leste tama iha taxa pobreza  71,7%  iha nasaun ASEAN ho rendimentu ki’ik-liu US$3.00 ba ema ida kada loron tanba Orsamentu Jerál Estadu (OJE) ne’ebé kada tinan Governu aprová  la tuun ba iha bazé.

Eis Titulár ne’e haktuir interpretasaun relatóriu Banku Mundiál dehan Timor-Leste tama iha 71%  ne’e ladún loos tanba antes ne’e  dehan 74%, maské nune’e,  ki’ak sei barak no sei boot.

“Mais ki’ak ida rabat rai nian ne’e 48%, osan la tuun ba bazé, ita dehan kresimentu ekonomikú osan barak-barak gasta orsamentu ne’e osan ne’e ba ne’ebé sé la tuun ba bazé osan ne’e ba ne’ebé povu mukit rabat rai loos atu sosa buat ida osan laiha la hatene atu han saida ki’ak aumenta liuliu aumenta iha tán Díli,” Marí Alkatiri  informa.

Nia haktuir ki’ak aumenta tanba povu barak iha sidade Díli buka moris ho negosiasaun maibé, hetan komunidade barak mak hetan eviksaun husi IX Governu.

“Ita ukun, ukun povu la’ós investidores investimentu ne’e mai bainhira ita ukun di’ak povu, selae sira laiha konfiansa,”nia tenik.

Relasiona situsaun ida-ne’e Mari Alkatiri husu Governu ida-ne’e presiza muda kultura lideransa hodi kombate taxa ki’ak iha Timor-Leste.

Jornalista: Zita Menezes