Timor-Leste Sei Enfrenta Eletrisidade Mate Iha Oras Neen Kada Loron

Primeiru-Ministru Kay Rala Xanana Gusmão. Imajen/Rafa.tl

DÍLI, RAFA.tl- Primeiru-Ministru (PM), Kay Rala Xanana Gusmão, Kinta (02/04/2026),  informa ba Prezidente Repúblika, José Ramos-Horta, kona-bá posibilidade medida sira ne’ebé Governu foti hodi halo poupansa ba enerjetika bainhira funu médiu oriente la termina.

Notísia Relevante: PM Xanana Garante Ba Prezidente Repúblika Rezerva Kombustível Too Fulan-Neen

Xefe Governu Timor-Leste Kay Rala Xanana Gusmão hateten, medida  poupansa enerjetika, ida mak sei redus oras fornesimentu eletrisidade. Nune’e, posivel eletrisidade sei halakan de’it husi tuku 05:00 madrugada to’o tuku 11:00 kalan.

Primeiru-Ministru Xanana Gusmão mós halo alerta ba membru órgaun soberanu sira, inklui funsionáriu sira ajente administrasaun públiku (direta no indireta) atu kontribui ba poupansa kombustível. Nune’e, iha loron ne’ebé la servisu, Sábadu-Domingu, karreta Estadu nian la nesesita halo movimentu.

Iha reuniaun Konsellu Ministru,  Kuarta liubá, Governu autoriza despeza millaun 168,8 Dollar Amérikanu ba akizisaun gazóleu litru millaun 80 hodi antisipa krize kombustível ne’ebé halo aumentu iha presu globál kauza husi funu iha Médiu Oriente.

“Ha’u informa ba Prezidenti Republika kuandu situsaun difisil teb-tebes, governu sei aviza katak eletrisidade to’o tuku  23:00 to’o fali tuku 05:00 dader sei hamate,” Xanana Gusmão inform aba jornalista sira hafoin reuniaun semanál ho Xefe Estadu iha Palásiu Prezidensiál.

Xefe Governu  akresenta problema ne’e liga ho fatór oin-oin, hanesan atrazu iha transporte internasionál, fornese limitadu husi rai-li’ur, no kapasidade armazenamentu ne’ebé seidauk sufisiente atu responde ba nesesidade kombustível nasaun nian.

“Ami ko’alia liu mak kona-bá hala’o análize ida ba funu iha Médiu Oriente ne’e ita buka akomapaña nia problema bainhira los mak hotu, tanba ida-ne’e maka ha’u informa ba Prezidenti Repúblika, horseik, Governu hasai rezulusaun ida hodi autoriza importadór ita nian ida sosa kedas  komvustivél  litru millaun 80 atu apoiu EDTL no mós fa’an ba povu,”  Xanana hateten.

Nia esplika Governu halo hela esforsu maka’as atu asegura fornesementu kontinua no autoridade sira diskute hela ho parseiru internasionál sira atu aselera prosesu importasaun no evita falta boot iha futuru.

Xefe Governu hatutan, problema lori kombustível sira ne’e mai fa’an, liliu iha Asia tomak tanba ida ne’e la’ós de’it atu subsidia presu ne’ebé as liu kustu normal, maibé agora laiha ona, ró sira bobot lori mina ho gas  liu husi Estreitu Ormuz nian, forsa Iraun  hapara hotu.

Reportajen ekipa Rafa.tl