Timor-Leste Lakon Kombatente, Aman no Erói Francisco Guterres Lú-Olo

PR José Ramos-Horta fó omenajen ba maktoban eis-Pr Francisco Guterres Lú-Olo.

Díli 23 Juñu 2026 (RAFA.TL)- Prezidente Repúblika, José Ramos-Horta, hateten Timor-Leste lakon kombatente no erói Francisco Guterres Lú-Olo ne’ebé hanesan fundadór no aman ba nasaun ne’e.

“Ita lakon kombate ida, veteranu tinan 24 luta ba independénsia, lakon polítiku ida, lakon erói ida ne’ebé serbi iha estadu, luta armada, polítika lideransa másimu FRETILIN nian iha rai laran,” Prezidente Repúblika José Ramos-Horta  hateten bainhira presta omenajen ba maktoban Lú-Olo iha  nia rezidénsia iha Farol, Tersa (23/06/2026).

Ramos-Horta hatutan, saudozu Francisco Guterres Lú-Olo nia dalan tranzitoria ne’e kompletu, hanesan Prezidente Assembleia Konstituiente, depois Prezidente Parlamentu Nasionál too Prezidente Repúblika. Tanba ne’e nia partida hanesan lakon boot, la’ós de’it ba lideransa FRETILIN maibé ne’e lakon boot ba Estadu.

“Mais ne’e sei fó nia eransa, nia legadu sei fó inspirasaun ba povu tomak, ba joven sira, inspirasaun ba FRETILIN, kontinua buat ne’ebé Nicolau Lobato rai hela iha rai laran. Ba li’ur Dr. Marí Alkatiri, ba ita hotu-hotu nune’e hanoin buat ne’ebé nia kontribui atu kontinua kaer metin rai ida ne’e iha dame nia laran, liberdade, demokrásia nia laran,” Ramos-Horta tenik.

Estadu iha obrigasaun tau-matan ba oan kiak sira

Prezidente Repúblika, José Ramos-Horta hateten klaru estadu tenke tau-matan duni ba faluk, oan-kiak sira, hanesan estadu tau-matan ba faluk hotu-hotu, oan kiak sira hotu-hotu.

“Ita sei haré primeiru tuir lei ne’ebé  eziste, se laiha tenke kria, haré lejislasaun ne’ebé dignu, fó apoiu ba ema família hanesan Prezidente Lú-Olo nian. Veteranu ida tinan 24 desde 1974,” Ramos-Horta afirma.

Xefe Estadu haktuir foin daudaun semana ruma liubá, iha Malázia, vizita privadu lansamentu livru no palestra hotu, hakarak ba vizita Prezidente Lú-Olo. Timor-oan ida nia iha hospitál, tenke ba vizita. Ba duni, maibé to’o iha ne’eba, ko’alia ho eis-primeira dama Cidalia. Tanba momentu ne’e Prezidente Lú-Olo iha tiha ona ICU ho penimonia, no fila mai Timor-Leste iha Aeroportu temi ba vizita, maibé la hatete buat ida kona-áa nia estadu klíniku, tanba ne’e la’ós kompetensia, doutor mak bele hatete.

“Purtantu sempre ho respeitu boot ba ema ne’ebé luta iha rai-laran, ema ne’ebé serbí Estadu no povu. Prezidente Lú-Olo, ita lakon boot ida ba nasaun,” Prezidente Repúblika José Ramos-Horta subliña.

Jornalista: Remigia Locatelli/Editór: Vito Salvadór