Timor-Leste Kontrola 66,6% iha Greater Sunrise Hafoin TIMOR GAP Sosa Asaun 10% Husi Osaka Gás

Prezidente no CEO TIMOR GAP, E.P., Rui Maria Alves Soares.

Díli, 25 Setembru 2026 (RAFA)- Prezidente no CEO TIMOR GAP, E.P, Rui Maria Alves Soares, konfirma TIMOR GAP sosa ona asaun 10% husi Osaka Gas Austrália iha kampu Greater Sunrise no tranzaksaun komersiál ne’e parte rua kompromente atu labele públika nia valór ba públika.

“Akordu asina ona, lori ona ba iha parte Governu Austrália ho Timor-Leste, ita hein sira aprova loos ona. Razaun TIMOR GAP sosa 10% husi Osaca Gás tanba sira hakarak foka ba atividade seluk, sira investe fatin seluk fali, entaun sira deside katak, sira hakarak husik hela no sira ne’e entrega fali ba TIMOR GAP depois sira foka fali ba investimentu iha parte seluk nian,” Prezidente no CEO TIMOR GAP, E.P,  Rui Maria Alves Soares informa hodi responde jornalista iha Díli, Sesta-ne’e.

Akizisaun 10%  Osaka Gás nian ne’e halo TIMOR GAP aumenta nia partisipasaun ka kontorla iha kampu Greater Sunrise hosi 56,6% ba  66,6%.

Rui Maria Alves Soares konsidera TIMOR GAP sosa asaun Osaka Gás ida ne’e di’ak liután, partisipasaun aumenta no asegura liután dada kadoras mai Timor-Leste. Tanba bainhira partisipasaun aumenta, asesu aumenta tan.

“Aspetu komersiál, téknika desizaun estratéjika, tanba ita kona-bá kontrola másimu bele orienta tuir objetivu. Nune’e kona-bá akizasaun ne’e aprovasaun finál husi governu rua tanba greater sunrise ne’e iha área espesiál.”

“TIMOR GAP nia negosiasaun ne’e konklui tiha ona, ami aseita malu ona katak, ami tenke sosa sira nia 10%. Ne’ebé ita hein de’it bele fulan ida, fulan rua mais husi ami nia parte loos, governu nia parte mak hein de’it asina loos ona,” nia konklui.

Ministru Petróleu no Rekursu Minerais, Francisco da Costa Monteiro, klarifika katak orsamentu ne’ebé uza ba akizisaun pursentu 10 hosi TIMOR GAP, E.P. kompañia mak jere, la’ós mai hosi Fundu Petrolíferu ka fundu emprestimu.

Ministru Petróleu no Rekursu Minerais, Francisco da Costa Monteiro informa katak informasaun kona-bá presu no estrutura finansiamentu akizisaun seidauk bele divulga ba públiku. Maske, nia komersialmente aprovadu ka aseitadu entre TIMOR GAP ho Osaka. Maibé, saida maka bele publika agora mak joint statement ruma ne’ebé sira tau iha públiku.

“Orsamentu ne’ebé halo akizasaun 10% Osaka Gás ne’e la’ós husi fundu petrolíferu no mós la’ós emprestimu, maibé osan TIMOR GAP, E.P. nian ne’ebé sira jere,” afirma Ministru Francisco Monteiro ba jornalista sira, Kinta-ne’e.

Ministru Francisco da Costa Monteiro hatutan aumentu partisipasaun ne’e bele fó oportunidade ba Timor-Leste atu iha influénsia boot liu iha prosesu dezenvolvimentu no implementasaun projetu Greater Sunrise, inklui iha diskusaun kona-bá desizaun estratéjika.

“TIMOR GAP aumenta tan oportunidade iha Greater Sunrise hodi fó biban ba ita atu bele influensia projetu ne’e nia lala’ok iha termu ezekusaun,” nia hateten.

Ministru Francisco Monteiro mós relata katak aumentu partisipasaun Timor-Leste iha Greater Sunrise sei lori nesesidade finansiamentu ne’ebé boot liu hosi parte Estadu, maibé Governu sei haré nesesidade ne’e hamutuk ho impaktu pozitivu ne’ebé bele hetan hosi aumentu partisipasaun.

“La’ós risku, maibé aumenta klaru nesesidade finansiamentu hosi parte Estadu. Ne’e realidade ida, maibé ita tetu mós ho nia aumentu ida ne’e, nia impaktu pozitivu ba projetu ne’e rasik,” tenik  Francisco Monteiro.

Tuir nia, akizisaun ne’e kobre partisipasaun Osaka Gás Austrália iha kontratu fahe produsaun rua, PSC 03-19 no PSC 03-20, iha Área Dezenvolvimentu Petrolíferu Konjuntu (JPDA), no arrendamentu retensaun australianu rua, NT/RL2 no NT/RL4, bainhira hein hela kontratu finál kona-bá fahe produsaun úniku ida iha ámbitu Tratadu Fronteira entre Timor-Leste no Austrália.

TIMOR GAP, E.P. antes ne’e estabelese akordu vinkulativu ho Osaka Gás Austrália atu akizita tomak nia partisipasaun pursentu 10 iha projetu Greater Sunrise.

Ho akizisaun ne’e, partisipasaun Timor-Leste liu hosi TIMOR GAP iha empreza konjunta Greater Sunrise aumenta ba 66,56%, tuir informasaun ne’ebé divulgadu kona-ba akizisaun.

TIMOR GAP, E.P. mak empreza petrolífera nasionál Timor-Leste nian, ne’ebé estabelese atu jere partisipasaun Estadu iha atividade esplorasaun no dezenvolvimentu petróleu, ho objetivu atu maximiza valór rekursu idrokarbonetu nasaun nian ba benefísiu populasaun Timor-Leste.

Jornalista : Cristina Ximenes/Remigia Locatelli