Timor-Leste Kompleta no Kumpri Ona Roteiru Lima Post Adezaun Ba ASEAN

Imajen/Reprodusaun

Díli, 26 Agostu 2026 (RAFA)- Vise-Ministra ba Asuntus ASEAN, Milena Maria da Costa Rangel, aprezenta ba Konsellu Ministru rezultadu relatóriu Sekretariadu ASEAN kona-ba implementasaun roteiru hosi adezaun plena Timor-Leste nian ba ASEAN.

Iha komunikadu ne´ebé RAFA asesu husi portal Ofisial Governu, Kuarta-ne´e haktuir, relatóriu, ne’ebé abranje progresu ne’ebé rejista ona husi fulan-Maiu 2025 to’o fulan-Janeiru 2026, destaka avansu sira ne’ebé Timor-Leste alkansa hodi kumpre rekizitu ne’ebé estabelese ona iha roteiru ne’e, inklui partisipasaun ativa iha reuniaun sira ASEAN nian, hametin mekanizmu koordenasaun interministeriál sira, funsionamentu Misaun Permanente Timor-Leste ba ASEAN, no mós dezignasaun entidade no pontu fokál nasionál sira ne’ebé responsavel ba área kooperasaun sira ne’ebé diferente. Entre fulan-janeiru no fulan-setembru 2025, Timor-Leste partisipa ona iha enkontru 455 hosi 504 ne’ebé hetan konvite, ne’ebé korresponde ba taxa partisipasaun 90,3%.

Husi rekizitu hitu ne’ebé prevee ona iha Roteiru, lima maka implementa tomak ona, inklui sira ne’ebé relasiona ho kapasidade institusionál, Misaun Permanente, mekanizmu implementasaun no koordenasaun nasionál, izensaun vistu no rekoñesimentu pasaporte, no mós obrigasaun finanseira ne’ebé mosu hosi adezaun.

Prosesu adezaun ba instrumentu jurídiku sira ASEAN nian implementa parsialmente ona, ho rekizitus pilár Polítiku-Seguransa no Sosiokulturál nian ne’ebé kompleta tiha ona no serbisu kontinua iha ámbitu Komunidade Ekonómika nian. Preparasaun ba infraestrutura no kapasidade lojístika ne’ebé nesesáriu ba responsabilidade futuru Timor-Leste iha ASEAN no ba Prezidénsia organizasaun ne’e iha tinan 2029 mós la’o hela.

Jornalista: Remigia Locatelli