Timor-Leste ho Xina Hametin Kooperasaun iha Área Defeza no Seguransa

Timor-Leste ho Xina asina akordu kooperasaun iha área defeza iha Díli, Kuarta 19 Agostu 2026.

Díli, 19 Agostu 2026 (RAFA)– Governu Timor-Leste ho Governu Repúblika Populár Xina, kontinua hametin kooperasaun iha área Defeza no Seguransa entre nasaun rua.

Iha vizita ofisiál Ministru Defeza Nasionál Repúblika Populár Xina, Almirante Dong Jun, mai Timor-Leste halo mós enkontru bilateral  iha Kuarter-Jenerál FALINTIL-Forsa Defeza Timor-Leste (F-FDTL), Fatuhada, Díli,  Kuarta ne’e,  ne’ebé nia prezensa  simu  direita husi Primeiru-Ministru no Ministru  Defeza Interinu Kay Rala Xanana Gusmão, akompaña ho parada militár husi membru F-FDTL.

Iha enkontru ne’e parte sira diskute kona-ba kestaun téknika iha área defeza, ho objetivu atu haforsa tan kooperasaun no kapasidade institusionál entre nasaun rua.

Kooperasaun Timor-Leste-Xina iha área defeza  no mós infraestrutura importante, inklui konstrusaun Ospitál Amizade Timor-Leste no Xina, ne’ebé sei konstrui besik Kuarter-Jenerál F-FDTL iha Fatuhada.

Hafoin remata enkontru Vise Xefe Estadu Maiór Jenerál F-FDTL, Calisto dos Santos Coliati hatete enkontru bilateral entre Ministru Defeza Xina  ho Ministru Defeza Timor-Leste nian, maibé tanba Ministru Defeza Timor-Leste iha kestaun kona-bá saúde bá  halo tratamentu iha Singapura,  nune’e maka Primeiru-Ministru Kay Rala Xanana Gusmão mak Ministru Interior Defeza.

“Enkontru ne’e toka liu asuntu defeza no seguransa, purtantu buat ne’ebé hala’o tiha ona no buat ne’ebé presiza atu hala’o iha futuru,”  Vise Xefe Estadu  Maiór  Jeneral Forsa Armada Calisto dos Santos Coliati hateten.

Iha ámbitu sorumutu ne’e, Ministru Defeza  Repúblika Xina kompartidu  atu kontinua fó apoiu nafatin bá Forsa Defeza Timor-Leste tanba durante ne’e Governu Repúblika Populár Xina  apoiu  iha área akademia militár, saúde militár,  no mós área lojistika.

“Agora ita nia membru militár sira ne’ebé hetan formasaun iha Xina, liu-liu iha área lojistika,  no área edukasaun mós iha área  ofisiál junior,” nia informa.

Nia afirma, enkontru ne’e mós  diskute asuntu kona-bá konstrusaun ospitál Militár,  ne’ebé sei konstrui iha tinan oin,  ne’ebé sei apoia  harii husi Governu Xina.

Nia subliña iha asinatura kooperasaun ne’e integra buat hotu iha laran, inklui apoia ospitál, apoiu lojistika, apoiu formasaun  bá rekursu umanu, liu-liu iha área lojistika ninia.

Kedete militár Timor-oan lubuk ida maka halo Estudu iha Xina, previstu  iha inisiu  fulan-Setembru tinan ne’e, ofisiál junior husi F-FDTL sei bá tan tuir  formasaun hodi hasa’e koñesimentu no fila mai hodi kontribui ba defeza nasionál no dezenvolvimentu instituisaun nian.

Jornalista: Marcelino Tomae