Timor-Leste ho EUA Diskuti Padronizasaun Kuríkulu no Dezenvolvimentu Saúde

Diretór Medical Planning iha Pacific Partnership, Kapitaun Tiffany Uranga, hamutuk ho reprezentante Embaixada Estadus Unidus Amérika iha Timor-Leste hasoru malu ho Vise-Primeiru-Ministru no Ministru Koordenadór Asuntu Sosiais, Mariano Assanami Sabino, iha Palásiu Governu, Segunda 31 Agostu 2026.

Díli, 31 Agostu 2026 (RAFA) — Diretór Medical Planning iha Pacific Partnership, Kapitaun Tiffany Uranga, Segunda-ne’e, hamutuk ho reprezentante Embaixada Estadus Unidus Amérika (EUA) hasoru malu ho Vise-Primeiru-Ministru no Ministru Koordenadór Asuntus Sosiais, Mariano Assanami Sabino, hodi diskute kona-bá  padronizasaun kuríkulu no dezenvolvimentu saúde atu bele tuir padraun internasionál.

Kapitaun Tiffany Uranga hateten, vizita ne’e fó oportunidade ba Pacific Partnership atu ko’alia kona-bá programa sira ne’ebé sira implementa iha Timor-Leste, inklui servisu hamutuk ho Universidade Nasionál Timor Lorosa’e (UNTL) ho Universidade da Paz (UNPAZ).

Iha sorumuk ne’e sira ko’alia kona-ba área saúde liuhosi programa Partnership no mós diskuti atividade balun ne’ebé sei hala’o iha fulan oin mai universidade sira husi Estadus Unidus sei mai enkontru ho UNTL no UNPAZ.

“Iha área saúde, diskusaun liubá padronizasaun kuríkulu no edukasaun saúde atu bele tuir padraun internasionál. Ida-ne’e konsidera importante tanba Timor-Leste agora tama ona iha ASEAN no presiza adapta sistema edukasaun saúde ho padraun ne’ebé aplikável iha rejiaun,” Kapitaun Tiffany Uranga hateten.

Nia hatutan, durante ne’e Timor-Leste servisu maka’as ho médiku sira husi Cuba, no estudante Timor-Leste barak mós hetan oportunidade atu estuda iha Cuba. Maibé, ho Timor-Leste nia integrasaun iha ASEAN, presiza haré fali no armoniza kuríkulu área saúde atu nune’e bele responde ba nesesidade no padraun rejionál.

Iha enkontru ne’e, Vise Primeiru Ministru mós hato’o agradese ba programa parseria Pacific Partnership ne’ebé kontinua servisu hamutuk ho ministériu no universidade sira iha Timor-Leste.

Programa ne’e la’ós de’it fó atensaun ba área saúde, maibé mós envolve atividade kona-bá jestaun no resposta ba dezastre naturál.

Iha tinan ida-ne’e, formasaun mós fó ba membru Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), liuliu sira ne’ebé servisu iha área dezastre naturál.

Ba área saúde, iha tinan ida-ne’e Pacific Partnership sei kontinua servisu hamutuk ho Ministériu Saúde, instituisaun ensinu superior no entidade relevante sira seluk.

Vise Primeiru Ministru hateten, Governu kontente no fiar katak programa parseria ne’e sei kontinua iha fulan sira oin mai.Tanba, fó oportunidade ba Timor-Leste atu haforsa kapasidade iha área saúde, edukasaun no resposta ba dezastre.

Nia mós konsidera katak, vizita no atividade sira ne’ebé sei hala’o iha fulan oin mai sei sai oportunidade importante atu diskute ho parseiru sira kona-ba programa no prioridade sira ne’ebé Governu Timor-Leste presiza implementa iha tinan sira oin mai.

Jornalista: Cesarina de Carvalho