Timor-Leste ho Benin Selebra Memorandu Entendimentu Kona-bá Izensaun Vistu Ba Titulár Pasaporte Diplomátiku

Ministru Negósius Estranjeirus no Kooperasaun Timor-Leste, Bendito dos Santos Freitas ho Ministra Negósiu Estranjeirus Repúblika Benin, Corinne Amori Brunet asina Memorandu Entendimentu kona-bá Izensaun Vistu ba Titulár Pasaporte Diplomátiku no Servisu, iha marjen 81.ª Sesaun Asembleia Jerál Nasoins Unidas, iha Nova Iorke. Imajen/MNEK

Díli, 26 Setembru 2026 (RAFA) – Repúblika Demokrátika Timor-Leste no Repúblika Benin foti tan pasu ida hametin relasaun bilaterál entre nasaun rua, liuhosi asinatura Memorandu Entendimentu kona-bá Izensaun Vistu ba Titulár Pasaporte Diplomátiku no Servisu, iha marjen 81.ª Sesaun Asembleia Jerál Nasoins Unidas, iha Nova Iorke.

Memorandu ne’e asina husi Ministru Negósius Estranjeirus no Kooperasaun Timor-Leste, Bendito dos Santos Freitas ho Ministra Negósiu Estranjeirus Repúblika Benin,  Corinne Amori Brunet.

Ministru Bendito dos Santos Freitas haktuir  asinatura ne’e reprezenta marku importante ida iha dezenvolvimentu relasaun entre nasaun rua. Timor-Leste no Benin estabelese ofisialmente relasaun diplomátika iha 10 Outubru 2023, hodi kria baze ba diálogu polítiku ne’ebé besik liután, interkámbiu diplomátiku no kooperasaun ne’ebé forte liután.

Tuir Memorandu ne’e, titulár pasaporte diplomátiku no servisu ne’ebé válidu sei hetan izensaun vistu, tuir dispozisaun sira ne’ebé nasaun rua konkorda. Arranju ida-ne’e sei fasilita viajen no interkámbiu ofisiál entre Governu rua no kontribui ba hametin liután relasaun institusionál no diplomátika.

“Akordu ne’e mós reflete Timor-Leste nia kompromisu atu habelar no diversifika ninia parseria diplomátika, inklui ho nasaun sira iha kontinente Afrika, no promove kooperasaun ne’ebé bazeia ba respeitu mútu, amizade no interese komún”, dehan Ministru Bendito iha komunikadu  ofisiá ne’ebé RAFA asesu iha Domingu-ne’e.

Asinatura iha Nova Iorke ne’e marka kapítulu foun ida iha relasaun Timor-Leste–Benin, hodi transforma relasaun diplomátika ne’ebé estabelese iha 2023 ba kooperasaun konkretu no kria oportunidade foun ba kolaborasaun iha nivel bilaterál no multilaterál.

Parte rua reafirma kompromisu atu kontinua aprofunda diálogu no esplora área foun sira ba kooperasaun ne’ebé fó benefísiu mútu iha tinan sira oinmai.

Jornalista: Cesarina de Carvalho