Timor-Leste Haksolok ho Sesárfogu Entre EUA no Iraun Durante Semana Rua

Primeiru-Ministru Kay Rala Xanana Gusmão. Imajen/Rafa.tl

Díli, 09 Abríl 2026 (RAFA.tl), –  Primeiru-Ministru Kay Rala Xanana Gusmão hatete, Timor-Leste haksolok rona novidade di’ak ne’ebé hato’o husi Prezidente Estadus Unidus Amérika (EUA), Donald Trump hodi halo suspensaun bombardeiamentu ba Iraun no iha ona akordu sesárfogu durante semana rua no Iraun koopera hodi loke dalan Ró nian iha Estreitu Ormuz.

Primeiru-Ministru Kay Rala Xanana Gusmão, ba jornalista sira iha Palásiu Prezidensiál, Díli, Kinta (09/04/2026) hateten, hanesan tanba funu mak presu kombustível sa’e tiha, maibé problema mak fornesimentu bele nafatin ka lae, ho problema sira ne’e hotu mak iha semana kotuk ne’e aprova tiha ona, bele dehan katak to’o fulan-Agustu, tinan ne’e,  kombustível sei la falta husi eletresidade to’o konsumidór privadu nian.

Xanana hatutan,  kontente oituan tanba akompaña mídia internasionál sira dehan katak, Iraun ho Estadus Unidus konkorda malu atu hapara fogo semana rua no Estadus Unidus aseita ho kondisaun katak husik Ró sira ne’e lori nafatin kombustível mai, tanba 20% konsumu iha mundu liu husi Estreitu Ormuz.

“Ne’ebé ha’u kontente tiha tanba Iraun konkorda ró boot sira no tanke boot sira bele sai ona,  ne’ebé aprova tiha horseik ho desizaun ida ba Ministériu relevante sira hanesan agrikultura, komérsiu atu haré dau-dauk ona hahán ne’e to’o iha ne’ebé. Karik to’o  fulan ikus Dezembru, ita presiza sosa tan hira ba Ministru Agrikultura, halo kálkulu ba kolleta hira atu Sentru Lojístika Nasionál (CLN, sigla portugés) bele sosa tiha, nune’e iha tinan 2029 krize mundiál Alimentasaun ita bele sosa hodi fa’an fali ho pressu baratu,” Primeiru-Ministru Kay Rala Xanana Gusmão hateten.

Xefe Governu haktuir, relasiona funu Médiu Oriente ne’e Governu tenke antisipa ona hodi responde problema ne’ebé mosu iha liur, maibé sei fó impaktu mós ba nasaun Timor-Leste.

“Ita husu boot atu situasaun ne’e labele komplika liu tanba mundu tomak simu impaktu husi funu ida ne’ebé dook husi ita,  maibé sei fó impaktu ba inflasaun, buat sira ne’e hotu tanba ita uza Dólar Amérikanu, nune’e ita tenke buka prepara aan hodi responde ba difikuldade ne’ebé sei mosu to’o iha fim do ano,” Xefe Governu Timor-Leste tenik.

Iraun  liu husi nia Ministru Negósiu Estranjeiru, Abbas Araghchi mós deklara ona abertamente ba públiku sei loke dalan Ró nian iha Estreitu Ormuz, durante semana rua. No asesu ida-ne’e sei sai posível de’it, liu husi koordenasaun ho Forsa Armada Iraun sira, no sei sujeita nafatin ba restrisaun téknika sira.

Jornalista: Élio dos Santos/Editór: Vito Salvadór