Timor-Leste Hahú Reuniaun ACNOC Hodi Haré Preparasaun Téknika Ba Prezidénsia ASEAN 2029

Díli, 16 Jullu 2026 (RAFA.TL)- Timor-Leste hahú reuniaun dahuluk Komité Ezekutivu Konsellu Nasionál Prezidénsia ASEAN (ACNOC, sígla inglés) hodi haré preparasaun téknika sira Timor-Leste nian bainhira asume responsabilidade ba prezidénsia ASEAN iha 2029.

Reuniaun ne’e hala’o tuir rezolusaun Governu nú.12/2026 ne’ebé aprova iha Konsellu Ministru. Rezolusaun ne’e nomeia Ministru Bendito dos Santos Freitas nu’udar Prezidente Komité Ezekutivu ACNOC, no fó mós apoiu direta ba Primeiru-Ministru, Kay Rala Xanana Gusmão, nu’udar Prezidente Konsellu Nasionál ACNOC.

Rezolusun Governu refere atribui kompeténsia tomak ba Ministru Negósius Estranjeirus no Kooperasaun, Bendito dos Santos Freitas hamutuk ho Vise-Ministra ba Assuntus ASEAN, Milena Rangel ho ekipa, atu koordena serbisu hotu ho ministériu relevante sira hodi prepara ba Simeira ASEAN iha 2029.

Reuniaun dahuluk Komité Ezekutivu ACNOC ne’e mak atu konsolida kondenasaun institusionál ne’ebé foku ba setór estratéjiku sira hanesan ba infraestruturas, polítika seguransa, diplomasia no komunikasaun atu kumpre rekizitu no ejijénsia prinsipál ba realizasaun simeira ASEAN iha 2029.

“Ita reuniaun iha ne’e atu debate apresentasaun husi husi Diretor jeral Asuntu ASEAN nian, kona-bá kada setór nia preparasaun, nia desafiu sira, ida ne’e importante teb-tebes ita atu konsolida kona-bá koordenasaun interministerial, importante liu-liu kona-ba istalasaun sira, infrastrutura kona-bá politika no seguransa diplomasia no komunikasaun no mos area importante seluk,’’Ministru  Bendito dos Santos Freitas hateten.

Governante ne’e hatutan, iha reuniaun ne’e mós diskute kona-bá progresu infraestrutura no fasilidade sira iha Timor-Leste hanesan Otél sira, Sentru Konvensaun Internasionál no mós kona-bá estatutu dezenvolvimentu Aero Portu iha Timor-Leste, no obra prinsipál sira seluk ne´ebé bele garante Timor-leste nia prizensia ba ASEAN iha 2029

Iha reuniaun ne’e mós governu tau iha planu rekrutamentu formasaun ba joven hamutuk 300-500 atu voluntáriu partisipativu iha servisu administrasaun kona-bá atendiementu ba nesesidade hotu-hotu.

Iha reuniaun ne’e Diretór-Jerál ba Assuntu ASEAN, Embaixadór Jorge Trindade mós halo aprezentasaun ida ba membru komité ezekutivu sira kona-ba preparasaun no dezafius ne’ebé kada setór sira hasoru.

Jornalista: Remigia Locatelli/Editór: Vito Salvadór